اردو | हिन्दी | English
365 Views
Sports

ونڈے ٹیم میں رینا کی واپسی ،اشون وجڈیجہ کوآرام

raina
Written by Tariq Hasan

نئی دہلی، 06 اکتوبر (یو این آئی) آف اسپنر روی چندرن اشون، آل راؤنڈر رویندر جڈیجہ اور تیز گیند باز محمد سمیع کو نیوزی لینڈ کے خلاف آئندہ پانچ میچوں کی ون ڈے سیریز کے پہلے تین میچوں کیلئے جمعرات کو اعلان کی گئی 15 رکنی ٹیم سے آرام دیا گیا ہے جبکہ بائیں ہاتھ کے بلے باز سریش رینا کی ٹیم میں واپسی ہوئی ہے ۔ایم ایس کے پرساد کی قیادت میں نئی [؟][؟]قومی سلیکشن کمیٹی نے ٹیم کا اعلان کیا۔پرساد نے ٹیم کا اعلان کرتے ہوئے کہا کہ اشون، جڈیجہ اور سمیع کو پہلے تین میچوں میں آرام دیا گیا ہے ۔رینا کی ٹیم میں واپسی ہوئی ہے ۔اتر پردیش کے رینا نے اپنا آخری ون ڈے اکتوبر 2015 میں کھیلا تھا۔رینا کو دسمبر جنوری میں آسٹریلیا کے دورے ، اس سال جون میں زمبابوے کے دورے اور اگست میں امریکہ میں ویسٹ انڈیز کے خلاف دو ٹوئنٹی 20 میچوں کی سیریز سے باہر رکھا گیا تھا۔ٹیسٹ کپتان وراٹ کوہلی، روہت شرما، اجنکیا رہانے ، ہردک پانڈیا، امت مشرا اور امیش یادو کو ہندستان کے پچھلے زمبابوے کے دورے میں آرام دیا گیا تھا۔ہندستان نے جون میں زمبابوے سے ہوئی تین ون ڈے میچوں کی سیریز 3۔0 سے جیت لی تھی۔محدود اوورز کے کپتان مہندر سنگھ دھونی نے زمبابوے کے دورے میں نوجوان کھلاڑیوں کی کمان سنبھالی تھی اور نیوزی لینڈ کے خلاف سیریز کے لیے بھی دھونی ہی کپتانی سنبھالیں گے ۔ہندستانی کرکٹ کنٹرول بورڈ (بی سی سی آئی) کی نئی سینئر سلیکشن کمیٹی نے اس طرح اپنی پہلی ٹیم کو منتخب کیا۔بی سی سی آئی کے جوائنٹ سکریٹری امیتابھ چودھری اور نئے چیف سلیکٹر ایم ایس کے پرساد نے ٹیم کا اعلان کیا۔زمبابوے کے دورے میں کھیلنے والے یجویندر چہل، رشی دھون، فیض فضل، کرونا نائر، لوکیش راہل، امباٹي رائیڈو، بریندر شرن اور جے دیو انادکٹ کو ون ڈے ٹیم میں جگہ نہیں ملی ہے ۔ہندستان اور نیوزی لینڈ کے درمیان پہلا ون ڈے 16 اکتوبر کو دھرم شالہ میں، دوسرا 20 اکتوبر کو دہلی میں اور تیسرا 23 اکتوبر کو موہالی میں کھیلا جائے گا۔چوتھا میچ 26 اکتوبر کو رانچی میں اور پانچواں میچ 29 اکتوبر کو وشاکھاپٹنم میں ہوگا۔ٹیم اس طرح ہے :مہندر سنگھ دھونی (کپتان)، روہت شرما، اجنکیا رہانے ، وراٹ کوہلی، منیش پانڈے ، سریش رینا، ہردک پانڈیا، اکشر پٹیل، جینت یادو، امت مشرا، جسپریت بمراھ، دھول کلکرنی، امیش یادو، مندیپ سنگھ اور کیدار جادھو۔

About the author

Tariq Hasan