پرینکا چوپڑہ دس ’ملینیئل لیڈرز‘ میں شامل

بالی وڈ کی کامیاب ترین اداکاراؤں میں شامل پرینکا چوپڑہ کو دنیا کے دس ملینیئل لیڈرز کی فہرست میں شامل کیا گیا ہے۔اس اعزاز پر انھوں نے اپنی خوشی کا اظہار کرتے ہوئے ٹوئٹر پر کہا: ’اس قدر شاندار لوگوں کی فہرست میں شامل کیا جانا بہت اچھا لگتا ہے۔ آپ کا شکریہ۔‘اس سے قبل وہ ٹائم میگزین کی انتہائی بااثر شخصیات کی فہرست میں شامل کی جا چکی ہیں اور اب انھیں ’یو ایس نیوز‘ کی فہرست میں شامل کیا گیا ہے۔ان نمایاں اور باوقار شخصیتوں میں پاکستان کی ملالہ یوسف زئی، کم جونگ ان، مارک زوکر برگ، پرنس ولیم، میری کیٹ اور ایشلی اولسین، رفائیل نڈال، سونیتا علی زادہ اور مہاری بلیک شامل ہیں۔پرینکا چوپڑہ کی چوپڑہ کی کامیابیوں کا سلسلہ جاری ہے لیکن انھیں اکثر اس سوال کا سامنا بھی رہتا ہے کہ وہ ’شادی کب کریں گی؟‘ان کے پرستار جاننا چاہتے ہیں کہ بالی وڈ اور ہالی وڈ میں اپنی شاندار اننگز کھیلنے والی پرینکا زندگی کی نئی اننگز کب شروع کریں گی؟پرینکا نے تو اس سوال کا اب تک کوئی واضح جواب نہیں دیا ہے لیکن ان کی ماں نے اس اسرار سے پردہ ضرور اٹھایا ہے۔پرینکا کی والدہ مدھو چوپڑہ نے ایک پروگرام میں کہا: ’جب بھی پرینکا کے پاس وقت ہوگا وہ شادی کر لے گی۔‘انھوں نے کہا کہ ’شادی کرنے کی عمر ہو گئی ہے اس لیے شادی کر لینی چاہیے، یہ لاجک (منطق) بہت بیکار ہے اور پرینکا اس بنیاد پر قطعی شادی نہیں کریں گی۔‘انھوں نے کہا: ’آج کل میں کئی شادیوں کو ٹوٹتے ہوئے دیکھ رہی ہوں، لوگوں کے پاس ایک دوسرے کو دینے کے لیے وقت نہیں ہوتا اسی ان کا رشتہ مضبوط نہیں ہو پاتا ہے۔‘مدھو چوپڑہ نے کہا کہ ’پرینکا ایسا نہیں کریں گی۔‘انھوں نے زور دے کر کہا کہ جب بھی پرینکا کے پاس اپنے رشتے کے لیے بھرپور وقت ہو گا، وہ شادی کریں گی۔انھوں نے کہا کہ پرینکا ہر کام کو اپنا سو فیصد دیتی ہیں، اپنے رشتے کے لیے اس کے پاس جب کافی وقت ہوگا اور وہ ازدواجی رشتے کی ذمہ داریوں کو ادا کر سکیں گی تبھی شادی کے بندھن میں بندھیں گی۔پرینکا فی الحال بے واچ کی شوٹنگ میں مصروف ہیں۔