پاکستانی وبھارتی فنکاروں کی مسلمانوں کوماہ رمضان کی مبارکباد

0
278

Taasir Urdu News Network | Uploaded on 17-May-2018

کراچی: 

پاکستان سمیت دنیا بھر میں ماہ صیام کا آغاز ہوگیا ہے اس ماہ مقدس کے موقع پر پاکستانی و بھارتی شوبز انڈسٹری سے تعلق رکھنے والے فنکار وں نے تمام مسلمانوں کو ماہ مقدس کی مبارکباد دی ہے۔

دنیابھر میں موجود تمام مسلمان ماہ رمضان کا مقدس مہینہ نہایت عقیدت و  احترام سے مناتے ہیں رمضان المبارک کی آمد کے ساتھ ہی فنکاروں کی جانب سے سوشل میڈیا پر تمام مسلمانوں کو مبارکباد دینے کا سلسلہ جاری ہے۔

بالی ووڈ شہنشا ہ امیتابھ بچن ہر سال مسلمانوں کے مذہبی تہوار رمضان اورعید پر مسلمانوں کو مبارکباد دیتے ہیں۔ رواں سال بھی انہوں نے ٹوئٹر پر رمضان مبارک کی دو خوبصورت تصاویر شیئر کراتے ہوئے تمام مسلمانوں کو مبارکباد دی۔

بین الاقوامی شہرت یافتہ پاکستانی اداکارہ ماہرہ خان نے ٹوئٹر پرتمام مسلمانوں کورمضان کی مبارکباد دیتے ہوئے کہا اس ماہ مقدس میں ہم سب پر ابر رحمت نازل ہو۔

اداکار رشی کپور سال بھر مسلمانوں کے خلاف جتنا بھی زہر اگلیں لیکن رمضان اور عید پر کبھی مبارکباد دینا نہیں بھولتے۔ اس سال بھی انہوں نے گزشتہ رات رمضان کا چاند نظر آنے کے بعد تمام مسلمانوں کو ماہ صیام کی مبارکباد دی۔

گلوکارہ واداکارہ رابی پیرزاداہ نے انسٹاگرام پر ایک ویڈیو پیغام کے ذریعے لوگوں کو رمضان کی مبارکباد دیتے ہوئے کہا خداہم سب کو توفیق دے کہ ہم اس ماہ روزے پورے رکھیں، عبادت کریں اور دوسروں کی مدد کریں۔

اداکارہ مایا علی نے بھی ٹوئٹر پر رمضان کی مبارکباد دیتے ہوئے کہا اللہ آپ سب کو عبادت کی توفیق عطاکرے، انہوں نے اپنے تمام چاہنے والوں سے درخواست کرتے ہوئے کہا کہ انہیں اور ان کی فیملی خاص طور پر ان کے والد کو اپنی دعاؤں میں یاد رکھیں، رمضان مبارک۔

اداکارومیزبان حمزہ علی عباسی نے رمضان کی اصل روح کے بارے میں بتاتے ہوئے کہا اللہ اس ماہ ہم سے چاہتا ہے کہ ہم اس ماہ خود کوباز رکھیں وہ ہم سے قربانی چاہتا ہے۔ رمضان مبارک، اللہ ہمیں اس ماہ کے آخر میں اچھا اوربہتر انسان بننے کی توفیق عطا کرے۔

اداکار ہمایوں سعید نے تمام لوگوں کو رمضان کی مبارکباد دیتے ہوئے کہا تمام لوگ رمضان کا یہ مقدس مہینہ محبت اور عقیدت سے گزاریں اور اس ماہ کی اصل روح اور حقیقت کو سمجھیں۔

نامور بالی ووڈ اداکار اور امیتابھ بچن کے صاحبزادے ابھیشیک بچن نے انسٹاگرام پر اپنی تصویرشیئر کراتے ہوئے مسلمانوں کو رمضان کریم کی مبارکباد دی ہے۔

پاکستانی اداکار ومیزبان فیصل قریشی نے نہایت خوبصورت انداز میں رمضان کی مبارکباد دیتے ہوئے کہا گزارش ہے رمضان المبارک کی مبارکباد کے اشتہار بے تحاشا آگئے ہیں۔ اب عبادات کا عملی اقدام اٹھائیں دوسرا یہ کہ اس رمضان المبارک میں ایک تہیہ کریں کہ جو اصلاحی پیغام وڈیو ‘ آڈیو یا تحریری صورت میں کسی کو بھیجیں اس پر پہلے خود عمل در آمد کریں انشاء اللہ اس سے معاشرے میں بہتری آئے گی۔