روہت شرما ٹی-20 میں300چھکے لگانے والے ایشیا کے پہلے کھلاڑی

نئی دہلی ، 05 مئی (یو این آئی) ہندستانی کرکٹ ٹیم کے سرکردہ بلے باز اور ممبئی انڈینس کے کپتان روہت شرما ٹی ٹوئنٹی کرکٹ میں300چھکے لگانے والے نہ صرف ہندستان بلکہ ایشیا کے پہلے کھلاڑی بن گئے ہیں ۔ ممبئی انڈینس کے کپتان روہت شرما نے یہ اعزاز آئی پی ایل سیزن ا لیون میں کنگز پنجاب الیون کو سترہویں اوور میں چھ وکٹوں سے شکست دیتے ہوئے حاصل کیا۔روہت شرما نے دنیائے کرکٹ میں چھکے مارنے والے ٹاپ ٹین کھلاڑیوں کی فہرست میں شمولیت اختیار کر لی ہے ، اس فہرست میں ان کا نمبر7ہے تاہم اس حوالے سے روہت پہلے ایشیائی کرکٹر ہیں۔ اس مقابلے سے پہلے روہت کے پاس 299 چھکوں کا ریکارڈ تھا، آئی پی ایل سیزن ا لیون میں کنگز الیون پنجاب کے خلاف کھیلے جانے میچ میں سترہویں اوور کی پہلی بال پر چھکا مار کر انہوں نے تین سو چھکوں کا ریکارڈ بنا لیا اور پھر پانچ بالوں کے بعد ایک اور چھکا مار کر تعداد 301 کر دی۔ روہت نے انٹرنیشنل کرکٹ میں 78 ، آئی پی ایل میں 183 چھکے لگائے ، باقی 40 چھکے ٹی ٹوئنٹی، چمپئنز لیگ، سید مشتاق علی ٹرافی اور دیگر کھاتے میں جاتے ہیں۔ اس فہرست میں صف اوّل کرس گیل ہیں جنہوں نے 844 چھکے لگائے ، کئیرون پولارڈ 525 چھکوں کے ساتھ دوسرے نمبر پر ، برینڈن میک کولم 445 چھکو ں کے ساتھ تیسرے ، ڈوائن اسمتھ 367 چھکوں کے ساتھ چوتھے ، شین واٹسن357 چھکوں کے ساتھ پانچویں، ڈیوڈ وارنر 319 چھکوں کے ساتھ چھٹے ، اور اب روہت شرما 301 چھکوں کے ساتھ ساتویں کھلاڑی بن گئے ۔ ایک اور ہندستانی کھلاڑی سریش رینا 290 چھکوں کے ساتھ لائن میں لگے ہیں۔