نئی دہلی، 15مئی(سید شمیم احمد) اقلیتی فلاح کے وزیر ڈاکٹر عبدالغفور نے گذشتہ رات جامعہ دارالعلوم عزیزیہ غازی آباد، یوپی کے زیراہتمام منعقد ساتویں عظیم الشان جلسۂ دستار بندی میں مہمان خصوصی کی حیثیت سے شرکت کی۔ تقریب کی صدارت حضرت مفتی اعجاز ارشد قاسمی ، ممبر آل انڈیا مسلم پرسنل لاء بورڈ، دہلی نے کی جبکہ نظامت کے فرائض حضرت مولانا عبدالمتین رحمانی فاضل دیوبند مہتمم جامعۃ العلوم الاسلامیہ ارریہ بہار نے انجام دیئے۔اس تقریب میں الشہیدہ غفور آرگنائزیشن کا بھی تعاون حاصل رہا۔ اس موقع پر بہار کے محکمہ اقلیتی فلاح کے وزیر ڈاکٹر عبدالغفور نے فارغ ہوئے حفاظ کرام کو مبارکباد پیش کی اوراس عظیم الشان جلسہ دستاربندی کے اہتمام کے لئے منتظمین کی ستائش کی۔ انہوں نے کہاکہ اللہ تعالی کا کلام ہمیشہ قائم و دائم رہے گا اور اس میں حفاظ کرام کا اہم رول رہے گا جنہوں نے اپنے سینے میں قرآن پاک کو اتار لیا ہے۔ اللہ کے کلام کی کسی بھی قیمت پر مٹایا نہیں جاسکتا۔ انہوں نے کہا کہ حفاظ کرام کی عزت و احترام کی جانی چاہئے کیوں کہ وہ اللہ کے کلام کی حفاظت میں لگے ہیں۔ تقریب سے خطاب کرنے والوں میں حضرت مولانا عبدالحنان صاحب قاسمی،امام و خطیب بڑی مسجد رمیش پارک، صدر جمیعۃ علماء ہند، مشرقی دہلی، حضرت مفتی ارشد قاسمی استاد حدیث مدرجہ ممبع العلوم گلاؤ کوٹھی بلند شہر،حضرت مفتی شاہد سرورامام و خطیب مسجد ابوبکر ، ذاکر نگر اوکھلا کے نام قابل ذکر ہیں۔ جلسۂ دستاربندی چاند بابو رحمن صدر جامعہ ہذا و جنرل سکریٹری قومی طلباء یونین این سی پی کی زیر سرپرستی منعقد کی گئی۔ تقریب کو الشہیدہ غفور آرگنائزیشن کے علاوہ حاجی تاج محمد سکریٹری مسجد کھوڑا کالونی ،حاجی محمد یونس سابق سکریٹری فردوس مسجد ، لکشمی نگر، حاجی عبدالغفار صاحب (جویلرس) لکشمی نگر، محمد خلیل احمد صاحب کھوڑا کالونی غازی آبادی کا بھی تعاون حاصل تھا۔