پٹنہ 17 جون (طارق حسن): روزنامہ’تاثیر‘ کے ایڈیٹر اور مشہور ماہرتعلیم ڈاکٹر محمد گوہر پرائیویٹ اسکول اینڈ چلڈرین ویلفیئر ایسوسی ایشن کے صدر سید شمائل احمد کے ساتھ ریاست کے وزیر تعلیم ڈاکٹر اشوک چودھری سے ان کی رہائش گاہ پر ملے اور بہار کو پورے ملک میں بدنام کرنے والے تعلیمی مافیاؤں کے خلاف سخت قدم اٹھانے اور ریاست میں معیاری تعلیم کیلئے کئے جارہے اقدامات کیلئے انہیں مبارکباد پیش کی اور امید ظاہر کی کہ ان کی کوششوں سے ریاست میں تعلیم کا معیار مزید بہتر ہوگا۔ اور بہار کے تعلیمی نظام پر جو داغ لگا ہے وہ پوری طرح دھل جائے گا۔ ڈاکٹر گوہر نے وزیرتعلیم کی اس بات کیلئے بھرپور ستائش کی کہ ان کی کوششوں سے 1974 کے بعد پہلی بار بہار میں بدعنوانی سے پاک امتحانات ہوئے اور امتحان میں جو سختی برتی گئی اس کے نتیجے میں نہ صرف طلبا پر بلکہ ان کے اساتذہ اور اسکولوں پربھی بہتر تعلیم مہیا کرانے کا دباؤ قائم ہوا۔ انہوں نے کہا کہ تعلیم یافتہ بہار ہی ترقی یافتہ بہار بن سکتا ہے ۔ اس لئے تعلیم کے معاملے میں کوئی سمجھوتہ نہیں ہونا چاہئے۔ انہوں نے بی ایڈ کالجوں پر شکنجہ کسنے کے محکمہ کے فیصلے کیلئے بھی وزیر تعلیم کا شکریہ ادا کیا اور کہا کہ تعلیم کے نام پر محض ڈگری تقسیم کرنا کسی بھی حیثیت سے ریاست اور ملک کے مفاد میں نہیں ہے۔ اس لئے حکومت اگر اس بات کو یقینی بنانے کیلئے ٹھوس قدم اٹھارہی ہے کہ بہار کے طلبا وطالبات ڈگری کے ساتھ ساتھ میرٹ کے معاملے میں بھی آگے رہیں تو یہ ایک مثبت پہل ہے اور اس کی ستائش ہر سطح پر ہونی چاہئے۔ ڈاکٹر گوہر اور سید شمائل احمد نے وزیر تعلیم کے ساتھ تقریباًایک گھنٹے کی ملاقات کے دوران کئی دیگر تعلیمی اور اقلیتی مسائل پر بھی ان سے تبادلہ خیال کیا۔ وزیرتعلیم نے انہیں یقین دلایا ہے کہ حکومت معیاری تعلیم مہیا کرانے کیلئے ہر ممکن قدم اٹھائے گی اور کسی بھی حال میں معیار سے سمجھوتہ نہیں کرے گی۔