نیویارک، 05 ستمبر (یو اے ن آئی) عالمی نمبر ایک کھلاڑی سربیا کے نوواک جوکووچ نے گزشتہ دو راؤنڈ کے آرام کے بعد کورٹ پر اپنے جوہر دکھاتے ہوئے مرد سنگلز کوارٹر فائنل میں آسانی سے داخلہ حاصل کر لیا ہے لیکن سال کے اپنے پہلے گرینڈ سلیم کی تلاش میں لگے چوتھی سیڈ رافیل نڈال فرانسیسی کھلاڑی لوکاس پوئلي کے خلاف ملی سنسنی خیز شکست کے بعد یو ایس اوپن ٹینس ٹورنامنٹ سے باہر ہو گئے ہیں۔ٹاپ سیڈ جوکووچ نے برطانیہ کے غیر سیڈ کھلاڑی کائل ایڈمنڈ کو مسلسل سیٹوں میں 6۔2 ،6۔1 ،6۔4 سے شکست دی۔لیکن 24 ویں سیڈ پوئلي نے بڑا الٹ پھیر کرتے ہوئے چوتھے راؤنڈ کے مقابلے میں ہسپانوی کھلاڑی رافیل نڈال کو 6۔1 ،2۔6 ،6۔4 ،3۔6 ،7۔6 کی میراتھن جدوجہد میں شکست دے کر باہر کر دیا۔خواتین کے سنگلز میں دوسری سیڈ جرمنی کی انجلک کربر نے پیٹرا کویتووا کو مسلسل سیٹ میں 6۔3 ،7۔5 سے شکست دے کر کوارٹر فائنل میں جگہ پکی کر لی۔کربر کے آخری آٹھ میں پہنچنے کے ساتھ ہی وہ امریکی کھلاڑی سرینا ولیمز کے سرفہرست مقام کے بھی قریب پہنچ گئی ہیں۔ اپنے ریکارڈ ساتویں یو ایس اوپن کے لئے کھیل رہیں سرینا کو اپنے نمبر ایک مقام کو بچانے کیلئے یو ایس اوپن کے فائنل تک پہنچنا ضروری ہو گا۔سال کے آخری گرینڈ سلیم میں سب سے بڑا الٹ پھیر کا شکار ہونے والوں میں نڈال رہے ۔ 14 بار کے گرینڈ سلیم چمپئن نے پانچ سیٹوں تک جدوجہد کی لیکن نوجوان کھلاڑی پوئلي نے ٹاءي بریک 8۔6 سے جیت کے ساتھ نڈال کو باہر کا راستہ دکھا دیا۔انتہائی دلچسپ مقابلے میں 22 سالہ فرانسیسی کھلاڑی نے آغاز سے ہی بہترین کھیل کا مظاہرہ کیا اور چوتھی سیڈ کھلاڑی کو چار گھنٹے سات منٹ کی جدوجہد میں بالآخر شکست دے دی۔24 ویں سیڈ پوئلي کا یہ مسلسل تیسرا پانچ سیٹوں کا مقابلہ تھا۔لیکن وہ اب تک ایک بھی اے ٹی پی ٹور ٹائٹل نہیں جیت سکے ہیں۔اس سے پہلے انہوں نے ومبلڈن میں بھی کوارٹر فائنل میں داخلہ حاصل کرکے سب کو چونکایا تھا۔انہوں نے نڈال پر بڑی فتح کے بعد کہا کہ میں اس سے بہتر کی توقع نہیں کر سکتا تھا۔پوئلي کا اگلا مقابلہ 10 ویں سیڈ ہم وطن کھلاڑی گائل مونفلس کے خلاف ہوگا جنہوں نے غیر سیڈ قبرص کے مارکوس بغداتس کے خلاف مسلسل سیٹوں میں 6۔3 ،6۔2 ،6۔3 سے جیت درج کی۔مونفلس نے ٹورنامنٹ میں اب تک ایک بھی سیٹ نہیں گنوایا ہے ۔دنیا میں 25 ویں نمبر کے کھلاڑی پوئلي کے ہاتھوں ملی ہار کے بعد نڈال کا سال کا پہلا گرینڈ سلیم جیتنے کا خواب بھی ٹوٹ گیا۔کلائی کی چوٹ سے برسرپیکار نڈال فرانسیسی اوپن کے تیسرے راؤنڈ کے بعد ہٹ گئے تھے جبکہ ومبلڈن میں حصہ ہی نہیں لے سکے تھے ۔سال 2004 کے بعد سے یہ پہلا موقع ہے جب نڈال سال میں کسی ایک بھی گرینڈ سلیم کے کوارٹر فائنل تک بھی نہیں پہنچے ہیں۔ہسپانوی کھلاڑی نے میچ میں 52 ونرس لگائے ۔