حیدرآباد،22اکتوبر(یواین آئی)مرکزی وزیر اطلاعات ونشریات ایم وینکیا نائیڈو نے طلاق ثلاثہ پر ملک میں جاری بحث کے درمیان آج اس کو غیر دستوری اورمخالف تہذیب قرار دیا ۔انہوں نے انسٹی ٹیویٹ آف چارٹرڈ اکاونٹٹس آ ف انڈیا کے شہر حیدرآبا دمیں پروگرام کے بعد میڈیا سے بات کرتے ہوئے کہا کہ انصاف،وقار اور مساوات کے اُصولوں کی روشنی میں جنسی امتیاز کو ملک سے ختم کرنے کا یہ موزوں وقت ہے ۔انہوں نے واضح کیا کہ طلاق ثلاثہ مخالف دستور،قانون کے خلاف ،جمہوری اُصولوں کے خلاف اور تہذیب کے مغائر ہے ۔انہوں نے دعوی کیا کہ یہاں تک کہ مسلم خواتین بھی انصاف کامطالبہ کر رہی ہیں۔کسی بھی قسم کا جنسی امتیاز نہیں ہونا چاہئے ۔دستور کی نظر میں تمام یکساں ہیں۔انہوں نے کہاکہ طلاق ثلاثہ کے مخالف دستوری ہونے کی رائے ابھر رہی ہے اور اس مسئلہ پر مباحث بھی ہورہے ہیں۔پہلے ہی اس معاملہ میں کافی وقت ہوچکا ہے ۔طلاق ثلاثہ کو ختم کرنے کے لیے ملک کے آگے بڑھنے کے لیے اب یہ موزوں وقت ہے تاکہ امتیاز کا خاتمہ ہوسکے ۔ سپریم کورٹ فی الحال اس مسئلہ کا جائزہ لے رہا ہے جہاں ہر کوئی جاکر اپنی تشویش سے واقف کرواسکتا ہے ۔مرکزی وزیر نے یکساں سیول کوڈ پر کہاکہ حکومت شفاف انداز میں ہر کام کرے گی اور پارلیمنٹ کو اعتماد میں لے گی ۔بعض طبقات اس بات کا جھوٹا پروپگنڈہ پھیلا رہے ہیں کہ حکومت پچھلے دروازے سے یکساں سیول کوڈ کے نفاذ کی کوشش کر رہی ہے ۔