پورٹ الزبتھ، 24 دسمبر (یو این آئی) جنوبی افریقہ کے دھماکہ خیز بلے باز اے بی ڈی ولیرس زمبابوے کے خلاف منگل سے شروع ہونے والے واحد ڈے نائٹ ٹیسٹ میچ کے لئے بالکل فٹ ہیں اور دو سال بعد دوبارہ اس فارمیٹ میں واپسی کے لئے تیار ہیں ۔جنوبی افریقہ میں یہ پہلا ڈے نائٹ میچ ہوگا جو چار دن کا ہوگا۔وہیں ڈیولیرس تقریبا دو سال بعد ٹیسٹ میں واپس آئیں گے ۔انہوں نے اپنا پچھلا ٹیسٹ میچ جنوری 2016 میں انگلینڈ کے خلاف سنچورین میں کھیلا تھا۔وہ اس دوران محدود اوورز کی کرکٹ کھیلتے رہے ہیں۔ 33 سال کے ڈیولیرس نے پہلے چار دن کے ٹیسٹ میچ کے پریکٹس سیشن سے الگ صحافیوں کو بتایاکہ مجھے خود پر یقین ہے کہ میں اس فارمیٹ اور حالات میں کھیل سکتا ہوں۔گزشتہ چھ ماہ کے دوران میں نے اپنے کھیل پر کافی محنت کی ہے ۔پریٹوریا یونیورسٹی میں میں نے جولائی میں ہی لال گیند سے کھیلنا شروع کر دیا تھا۔اب میں اس فارمیٹ کے لئے خود کو پوری طرح تیار محسوس کر رہا ہوں۔ڈی ولیرس نے جنوبی افریقہ کے لئے اب تک 106 ٹیسٹ میچ کھیلے ہیں جس میں انہوں نے 21 سنچری اور 39 نصف سنچری کی بدولت 8074 رنز بنائے ہیں۔انہوں نے کہاکہ تیز وکٹ پر کل رات میں نے ایک گلابی گیند سے شاٹ کھیلا جو کافی مشکل تھا اور پھر سے وہی چیلنج آنے والا ہے ۔یہی اس کھیل کی خوبصورتی ہے ۔ آئی سی سی ٹیسٹ رینکنگ میں جنوبی افریقہ اس وقت دوسرے نمبر پرہے اور اسے اگلے سال جنوری میں تین میچوں کی ٹیسٹ سیریز کے لئے عالمی درجہ بندی میں نمبر ایک ہندستان کی میزبانی کرنی ہے ۔جنوبی افریقہ کو پھر اس کے بعد مارچ اپریل میں چار میچوں کی ٹیسٹ سیریز کے لئے آسٹریلیا کے خلاف میدان میں اترنا ہے ۔ ابراہم بینجمن ڈیولیرس نے کہاکہ ہم دنیا کی نمبر ایک ٹیم بننا چاہتے ہیں اور اس سے زیادہ دور نہیں ہیں۔ہمیں معلوم ہے کہ اگر ہم اگلے تین مہینوں میں کچھ مضبوط ٹیموں کے خلاف سیریز جیتتے ہیں تو ہم نمبر ایک رینکنگ حاصل کر سکتے ہیں۔ لیکن ہم ایک وقت میں ایک ہی کام کریں گے ، اس سے ہم اپنا مقصد آسان¸ سے حاصل کر سکتے ہیں۔