ورلڈ کپ میں نصف ٹیمیں ایشیا سے

نئی دہلی، 24 مارچ (یواین آئی) انگلینڈ میں 2019 میں ہونے والے ایک روزہ عالمی کپ کرکٹ ٹورنامنٹ میں حصہ لینے والی دس ٹیموں میں نصف ٹیمیں ایشیا کی ہوں گی۔ افغانستان ورلڈ کپ کے لئے کوالیفائی کرنے والی 10 ویں ٹیم ہے ۔افغانستان نے گزشتہ روز ہرارے میں آئرلینڈ کو آئی سی سی کوالی فائرس کے کرو یا مرو کے مقابلے میں پانچ وکٹ سے شکست دے کر 2019 کے ورلڈ کپ کا ٹکٹ حاصل کر لیا تھا۔اس ٹورنامنٹ سے دو ٹیموں کو جگہ ملنی تھی۔ دو مرتبہ کے سابق چیمپئن ویسٹ انڈیز نے سب سے پہلے ٹکٹ حاصل کیا تھا اور پھر افغانستان ورلڈ کپ میں پہنچنے والی 10 ویں ٹیم بن گیا ۔ ورلڈ کپ میں ایشیا سے اترنے والی پانچ ٹیموں میں دو مرتبہ کی چمپئن ہندوستان ، ایک ایک مرتبہ کا چمپئن پاکستان اور سری لنکا، بنگلہ دیش اور افغانستان ہیں۔ ورلڈ کپ کی دیگر ٹیمیں آسٹریلیا، میزبان انگلینڈ، جنوبی افریقہ، نیوزی لینڈ اور ویسٹ انڈیز ہیں۔ ورلڈ کپ کی یہ دس ٹیمیں ایک ہی گروپ میں آپس میں لیگ میچ کھیلیں گی اور چار سرفہرست ٹیمیں سیمی فائنل میں داخلہ حاصل کریں گی۔ بین الاقوامی کرکٹ کونسل نے اس ورلڈ کپ میں وہی فارمیٹ اختیار کرنے کا فیصلہ کیا ہے جو آسٹریلیا اور نیوزی لینڈ میں 1992 کے ورلڈ کپ میں تھا۔ 1992 کے عالمی کپ میں نو ٹیموں نے حصہ لیا تھا۔ 2019 کے ورلڈ کپ میں 12 اسٹیڈیم میں کل 48 میچ کھیلے جائیں گے جبکہ گزشتہ ورلڈ کپ میں 14 ٹیموں نے حصہ لیا تھا اور 49 میچ کھیلے گئے تھے ۔