کشی نگر /لکھن¶، 26 اپریل (یو این آئی) اترپردیش میں کشی نگر کے بشن پورا علاقے میں آج صبح ایک اسکول گاڑی بغیر گارڈ والے ریلوے کراسنگ پر ٹرین سے ٹکرا گئی جس کی وجہ سے 13 بچوں کی موت ہو گئی اور دیگر چھ زخمی ہو گئے ۔ڈائریکٹر جنرل آف پولیس کے دفتر سے ملی اطلاعات کے مطابق بشن پورا علاقے میں صبح تقریبا پونے سات بجے سیوان۔ گورکھپور ریل سیکشن پر مشرقی جھالا کے بغیر گارڈ والے ریلوے کراسنگ پر ایک پرائیویٹ اسکول کی ٹاٹا میجک گاڑی ٹرین سے ٹکراگئی ۔ اس حادثے میں دس بچے اور ڈرائیور کی موقع پر ہی موت ہوگئی جبکہ دو بچوں نے بعد میں دم توڑ دیا۔انہوں نے بتایا کہ حادثے میں زخمی چھ بچوں کو اسپتال میں داخل کرادیا گیا ہے جن میں سے تین کی حالت تشویشناک ہے ۔ اترپردیش کے وزیراعلی یوگی آدیتہ ناتھ نے اس حادثے پر گہرے دکھ کا اظہار کرتے ہوئے گورکھپور کے ڈویژنل کمشنر انل کمار کو جائے حادثے پر بھیجا ہے اور اس حادثے کی اعلی سطحی تحقیقات کا حکم دیا ہے ۔ انہوں نے ضلع انتظامیہ کو زخمیوں کے مناسب علاج کا بندوبست کرنے کی ہدایت کی ہے ۔اس درمیان ڈی جی پی او پی سنگھ نے اس حادثے میں 13 بچوں کے مرنے کی تصدیق کرتے ہوئے بتایا کہ چھ زخمیوں کو اسپتال میں داخل کرادیا گیا ہے ۔ لاش پوسٹ مارٹم کے لئے بھیج دی گئی ہے ۔ انہوں نے بتایا کہ ضلع افسران اور بچا¶ ٹیم موقع پر پہنچ گئی ہے ۔صدر جمہوریہ رام ناتھ کووند اور وزیر اعظم نریندر مودی نے اتر پردیش کے کشی نگر میں ہوئے حادثے پر آج گہرے دکھ کا اظہار کیا ہے ۔مسٹر کووند نے ٹویٹ کیا ” کشی نگر ( اتر پردیش) میں معصوم بچوں کو لے جا رہی بس حادثے کے بارے میں جان کر بہت دکھ ہوا ہے ۔ میری تعزیت اور دعائیں سوگوار کنبوں اور زخمی افراد خاص طور پر بچوں کے ساتھ ہے ”۔مسٹر مودی نے کرناٹک اسمبلی انتخابات کی تیاری میں مشغول بھارتیہ جنتا پارٹی کے کارکنان اور امیدواروں سے ‘نمو ایپ’ کے ذریعے گفتگو کرتے ہوئے کشی نگر حادثے پر گہرے رنج و غم کا اظہار کیا ہے ۔ انہوں نے کہا ”اس حادثے کے بارے میں جان کر بہت دکھ ہوا۔ متاثرہ خاندانوں کے تیئں میری تعزیت۔ مجھے امید ہے یوپی حکومت اور ریلوے انتظامہ اس حادثے کی تحقیقات کرائے گی۔بہار کے وزیراعلیٰ نتیش کمار نے بھی اترپردیش کے کشی نگر میں ہوئے ریل حادثے میں اسکولی بچوں کی موت پر گہرے صدمے کااظہار کیا ہے۔ وزیراعلیٰ نے کہا ہے کہ یہ حادثہ انتہائی دردناک ہے۔ موصولہ اطلاع کے مطابق اس حادثے میں بہار کے بھی دو بچوں کی موت ہوئی ہے اور دو بچے شدید طور پر زخمی ہوئے ہیں۔ جن کا علاج آئی سی یو میں چل رہا ہے۔ وزیراعلیٰ نے بہار سے تعلق رکھنے والے دو بچوں کے قریبی ورثا کو 2-2 لاکھ روپئے وزیراعلیٰ راحت فنڈ سے مہیا کرانے کا حکم دیا ہے اور غمزدہ خاندان کے ساتھ تعزیت کااظہار کیا ہے اور ان کیلئے صبر جمیل کی دعا کی ہے۔ وزیراعلیٰ نے اس حادثے میں زخمی ہونے والے بچوں کی جلد صحت یابی کی دعا کی ہے۔ ریلوے کے وزیر پیوش گوئل نے اتر پردیش کے کشی نگر میں ایک اسکول گاڑی کے بغیر گارڈ والے ریلوے کراسنگ پر ٹرین سے ٹکرانے کی وجہ سے ڈرائیور سمیت 13 بچوں کی موت کے معاملہ میں آج تحقیقات کا حکم دیئے ۔مسٹر گوئل نے ٹویٹ کر کے کہا”کشی نگر میں ہوئے حادثے میں اسکولی بچوں کی موت المناک خبر ہے ، میں نے اعلی افسران کو حادثے کی تحقیقات کاحکم دے دیا ہے ۔ مرنے والوں کے واحقین کو ریلوے کی جانب سے دو لاکھ روپے کی مدد دی جائے گی جو اتر پردیش کی حکومت کی طرف سے دی جا رہی دو لاکھ کی رقم کے علاوہ ہو گی۔