Taasir Urdu News Network | Uploaded on 25-September-2018
امیٹھی،(یو این آئی) کیلاش مانسرور یاترا سے واپس لوٹنے کے بعد پیر کو دو روزہ دورے پر اپنے پارلیمانی حلقہ امیٹھی پہنچے کانگریس صدر راہل گاندھی کا شیو بھکتوں نے زبردست استقبال کرکے حریف پارٹی کی نیندیں اڑا دیں۔لکھنوء میں چودھری چرن سنگھ ایئرپورٹ پر اتر کر سڑک کے راستے امیٹھی کے بہادر پور کے نگوہا گاؤں پہنچے راہل گاندھی کا شیو بھکتوں نے اپنے روایتی انداز میں استقبال کیا اور میمنٹو بھی پیش کیا۔شیو بھکتوں نے راہل گاندھی کو اپنے درمیان پاکر خوب نعرے بازی کی۔مسٹر راہل نے نگوہا میں راجیو گاندھی مہلا وکاس اسکیم کے دفتر کا افتتاح بھی کیا اور وہاں موجود اپنی مدد آپ ٹیم کے کارکنوں سے ملاقات بھی کی ۔خیال رہے کہ راہل گاندھی کے اس دورے پر شیو کے پیروکاروں کے ذریعہ استقبالیہ پروگرام کا انعقاد اس لئے بھی کیا گیا ہے کیونکہ گذشتہ سات ستمبر کو رائے بریلی ۔امیٹھی کے ایک روزہ دورے پر گئی مرکزی وزیر اسمرتی ایرانی نے راہل گاندھی کی مانسرور یاترا پر کئی سوال کھڑے کئے تھے ۔