ہندستان ہندوستان

اردو یونیورسٹی کٹک کیمپس کا وزیر اعلیٰ نوین پٹنایک کے ہاتھوں سنگ بنیاد

Written by Taasir Newspaper

Taasir Urdu News Network | Uploaded on 07-November-2018

حیدرآباد، (پریس نوٹ) مولانا آزاد نیشنل اردو یونیورسٹی کے کٹک کیمپس کا کل وزیر اعلیٰ اڈیشہ جناب نوین پٹنائک کے ہاتھوں سنگ بنیاد رکھا گیا۔ اس موقع پر خطاب کرتے ہو ئے جناب نوین پٹنائک نے کہا کہ اردو یونیورسٹی کے وائس چانسلر نے کٹک میں اس تکنیکی ادارے کے قیام کے ذریعہ ایک گراں قدر کارنامہ انجام دیا ہے جو اڈیشہ کے اقلیتی طبقے کے لیے نہایت اہمیت کا حامل ہے۔ اقلیتیں میرے دل کے قریب ہیں اور میں ان کے فلاح و بہبود کیلئے پابند عہد ہوں۔ انہوں نے اس موقع پر ڈاکٹر محمد اسلم پرویز ‘ وائس چانسلر‘ مانو کی درخواست پر مانو کٹک کیمپس کے لیے مزید 5 ایکڑ اراضی الاٹ کرنے کا اعلان بھی کیا۔ واضح رہے کہ یہ کیمپس وزارت فروغ انسانی وسائل، نئی دہلی سے منظور شدہ ہے اور یونیورسٹی گرانٹس کمیشن نے اس کے لیے فنڈس فراہم کیے ہیں۔ مانو کٹک کیمپس میں تعلیمی سرگرمیوں کا آغاز رواں تعلیمی سال 2018-19 سے ہوچکا ہے۔ پالی ٹیکنک اور آئی ٹی آئی عمارتوں کا تعمیری کام سی پی ڈبلیو ڈی، کٹک کے سپرد کیا گیا ہے۔ ڈاکٹر اسلم پرویز نے اپنی تقریر میں وزیر اعلیٰ سے کٹک کیمپس کے لیے 5 ایکڑ اراضی کی فرا ہمی پر شکریہ ادا کیا اور ان سے مزید اراضی کی درخواست کی۔ جسے وزیر اعلیٰ نے فوری قبول کرلیا۔ انہوں نے کٹک کے عوام کو مبارکباد دی اور مزید کہا کہ مانو کٹک کیمپس، اڈیشہ کے اردو داں طبقے کی تعلیمی ضروریات کی تکمیل کے لیے معاون ثابت ہوگا۔ مشیر کٹک کیمپس پروفیسر ایم کیو خان نے جلسے کی صدارت کی اور کیمپس سے متعلق رپورٹ پیش کی۔ ڈین سٹیلائٹ کیمپسس پروفیسر ایس ایم رحمت اللہ نے مہمانو ں کا خیر مقدم کیا۔ جبکہ ڈائرکٹر کیمپس، ڈاکٹر بی کے مہاپاترا نے شکریہ ادا کیا ۔اس موقع پر وزیر فینا نس اڈیشہ جناب ششی بھوشن بہیرا؛ وزیر صحت و قانو ن جناب پرتاپ جینا ؛ رکن پارلیمان کٹک ایس جے بھرتروہری مہتاب؛ ایم ایل اے بارابتی (کٹک) دیباشیش سمنت رائے نے بھی خطاب کیا۔ جلسے میں چیف انجینئر،سی پی ڈبلیو ڈی جناب آر کے شمی ؛ جناب ایس این رائو، ایگزیکیٹو انجینئر، مانو اور دیگر معززین ‘ تدریسی و غیر تدریسی عملے کے ارکان ، طلبہ و طالبات اور مقامی افراد کی کثیر تعداد نے شرکت کی۔

About the author

Taasir Newspaper