فن فنکار

اس بار ہماری موت واقع نہیں ہوگی‘ رنویر سنگھ

Written by Taasir Newspaper

Taasir Urdu News Network | Uploaded on 15-June-2019

ممبئی ۔(یواین این )بولی وڈ اداکار رنویر سنگھ اور دپیکا پڈوکون اپنے کیریئر میں چوتھی مرتبہ ایک ہی فلم میں ساتھ کام کرنے جارہے ہیں تاہم رنویر سنگھ کی خوشی کی وجہ یہ نہیں بلکہ کچھ اور ہے۔دپیکا پڈوکون اپنے شوہر اداکار رنویر سنگھ کی اگلے سال ریلیز ہونے والی فلم ’’83 ‘‘کا حصہ بن چکی ہیں، یہ فلم نامور بھارتی کرکٹر کپل دیو کی زندگی پر مبنی ہے، جس میں دپیکا کپل دیو کی اہلیہ رومی بھاٹیا کا کردار نبھائیں گی۔دپیکا اور رنویر دونوں نے اس فلم کی کاسٹنگ کے حوالے سے اپنے سوشل میڈیا اکاؤنٹس پر تصاویر بھی شیئر کی۔اداکارہ نے اپنے انسٹاگرام اکاؤنٹ پر فلم کے ہدایت کار کبیر خان اور رنویر سنگھ کے ہمراہ ایک تصویر شیئر کی، جس پر دپیکا نے کبیر خان کا فلم میں کاسٹ کرنے کے حوالے سے شکریہ ادا کیا۔اس تصویر پر دپیکا کے شوہر اور فلم کے مرکزی اداکار رنویر سنگھ نے ایک دلچسپ کمنٹ بھی کیا۔اداکار نے لکھا کہ اور اس بار آخر میں ہماری موت نہیں ہوگی اور اس پر اپنی خوشی کا اظہار کیا۔واضح رہے کہ رنویر سنگھ اور دپیکا پڈوکون ایک ساتھ 3 فلموں میں کام کرچکے ہیں، جن میں رام لیلا، باجی راؤ مستانی اور پدماوت شامل ہیں۔

About the author

Taasir Newspaper