کھیل

روہت کی 24 ویں سنچری، سچن اور وراٹ کو پیچھے چھوڑا

Written by Taasir Newspaper

Taasir Urdu News Network | Uploaded on 17-June-2019

مانچسٹر،(یو این آئی) ہٹ مین کے نام سے مشہور روہت شرما (140) نے اپنے کیریئر کی 24 ویں ون ڈے سنچری بنا لی ہے۔ روہت نے پاکستان کے خلاف عالمی کپ میچ میں اتوار کو اپنی 24 ویں ون ڈے سنچری بنائی اور اس کے ساتھ ہی انہوں نے ہم وطن سچن تندولکر اور وراٹ کوہلی کو پیچھے چھوڑ دیا۔32 سالہ روہت اپنے 209 ویں میچ میں اس کامیابی پر پہنچے ہیں۔ وہ اس وقت ون ڈے میں سب سے زیادہ سنچری بنانے والے بلے بازوں کی فہرست میں نویں مقام پر ہیں۔ روہت کی اس عالمی کپ میں یہ دوسری سنچری ہے۔ روہت نے پانچ جون کو ساؤتھمپٹن میں جنوبی افریقہ کے خلاف میچ فاتح ناٹ آؤٹ 122 رنز بنائے تھے۔ روہت نے 113 گیندوں پر 140 رنز کی اننگز میں 14 چوکے اور تین چھکے لگائے۔ یہ ان کے کیریئر کا دسواں بہترین اسکور ہے۔24 ون ڈے سنچری بنانے میں سب سے کم اننگز لینے کے معاملے میں روہت ہم وطن سچن تندولکر کو پیچھے چھوڑ کر چوتھے نمبر پر پہنچ گئے ہیں جبکہ اس سنچری سے وہ دونوں ممالک کے درمیان عالمی کپ میں سب سے زیادہ اننگز کھیلنے والے کھلاڑی بن گئے ہیں اور اس معاملے میں انہوں نے اپنے کپتان وراٹ کے 107 رنز کو پیچھے چھوڑا ہے۔ون ڈے میں 49 سنچریوں کے عالمی ریکارڈحامل سچن نے 24 سنچریوں کے لئے 219 اننگز کھیلی تھیں جبکہ روہت نے 203 اننگز کھیلی ہیں۔ اے بی ڈیولیرس نے 24 سنچریوں کے لئے 192 اننگز، وراٹ کوہلی نے 161 اننگز اور ہاشم آملہ نے 142 اننگزکھیلی تھیں۔ہندستان اور پاکستان کے درمیان ورلڈ کپ میچوں میں کسی کھلاڑی کا سب سے زیادہ اسکور وراٹ کا تھا جنہوں نے 2015 کے گزشتہ عالمی کپ میں ایڈیلیڈ میں 107 رن بنائے تھے۔ پاکستان کے سعید انور نے 2003 کے ورلڈ کپ میں ہندستان کے خلاف سنچورین میں 101 رنز بنائے تھے جبکہ سچن نے سینچورین کے ہی اسی میچ میں 98 رنز کی اننگز کھیلی تھی۔

About the author

Taasir Newspaper