ملالہ پر بننے والی فلم ’گل مکئی‘ کی نمائش کی تاریخ کا اعلان

Taasir Urdu News Network | Uploaded on 09-Jan-2020

ممبئینوبل انعام یافتہ ملالہ یوسف زئی کی زندگی پر بننے والی بھارتی فلم گل مکئی کی نمائش کی تاریخ کا اعلان کردیا گیا ہے۔بھارتی ہدایت کار امجد خان نے اعلان کیا ہے ملالہ یوسف زئی کی زندگی اور ان کی جدوجہد پر بننے والی فلم ’گل مکئی ‘ کو 31 جنوری 2020 کو نمائش کے لیے پیش کردیا جائے گا۔ اس فلم کی تیاری کا آغاز 2017 میں ہوا تھا اور گزشتہ برس پہلا ٹریلر بھی جاری کیا گیا تھا۔اس فلم میں ملالہ کا کردار انڈین ٹیلیوڑن میں کام کرنے والی اداکارہ ریم شیخ ادا کررہی ہیں جب کہ ملالہ کی والدہ کا کردار اداکارہ دیویا دتہ اور والد کا کردار اتل کلکرنی نبھائیں گے۔ فلم کی دیگر کاسٹ میں مکیش رشی، ابھیمنیو سنگھ اور اعجاز خان فلم شامل ہیں۔ فلم کی عکس بندی کشمیر میں کی گئی ہے۔اس فلم کی خاص بات انتہا پسندی کیخلاف پاکستانی فوج اور عوام کی قربانیوں کا اعتراف کرنا ہے، فلم میں دکھایا گیا ہے کہ دہشت گردی کے خلاف پاکستانی معاشرہ کیسے ایک چٹان کی طرح ثابت قدم رہا اور دہشت گردی کیخلاف جنگ میں فتح حاصل کی۔