Taasir Urdu News Network | May 13, 2020

معروف شاعر مظفّر حنفی کی مرکزی حکومت سے اپیل

حکومتِ ہند کی طرف سے کورونا وبا کے دور میں اردو کے ساتھ نا انصافی پر مشہور شاعر مظفر حنفی نے اپنی ناراضی کا اظہار کیا ہے۔ انھوں نے حکومت سے مطالبہ کیا ہے کہ آروگیہ سیتو ایپ میں اردو کو شامل کیا جائے۔ انھو نے اردو اداروں سے بھی اپنا غصہ ظاہر کیا ہے کہ وہ اپنا کام ایمان داری سے نہیں کر رہے اور اس طرف اب تک توجہ نہیں دی جس کی طرف سب سے پہلے بزمِ صدف انٹرنیشنل نے آواز اُٹھائی۔

انجنیر ، ادیب اور سماجی کارکن جناب فیروز مظفّر نے بہت سخت الفاظ میںاپنے غم و غصّے کا اظہار کرتے ہوئے کہا کہ حکومت کو اردو میں آروگیہ سیتو ایپ فوراً جاری کرنا چاہیے۔ ورنہ دِکھاوے کے ادارے این سی پی یو ایل اور تمام اردو اکادمی کو بند کر دینا چاہیے۔ جب وہ کام کرتے ہی نہیں ۔ انھو ں نے اپنے والد مظفر حنفی کے تین شعر بھی پیش کیے:

جانے بچتی ہے کہ مرتی ہے اردو
چند سلوں کو اسی خوف و خطر میں دکھے
ہم سوختہ نصیب اسی سرزمیں کے ہیں
اردو زباںبھی، تاج محل بھی ہمارا ہے
ستم رسیدہ ہے ہندوستان میں اردو
اسی زباں میں ہندوستاں زیادہ ہے

انجنیر فیروز مظفر نے بزمِ صدف انٹرنیشنل کا شکریہ ادا کرتے ہوئے افسوس ظاہر کیا کہ جو کام دہلی میں لوگوں کو کرنا تھا، اس کے لیے سید شہاب الدین نے پہل کی ۔ آخر میں انھوں نے مرکزی حکومت سے درخواست کی کہ آروگیہ سیتو ایپ میں اردو زبان کو شامل کرے۔انھوں نے مزید کہا کہ کل وہ ڈاکٹر ہرش وردھن کو خط بھی لکھیں گے۔