نئی دہلی، 25 مارچ: اپوزیشن کے احتجاج کے درمیان آج لوک سبھا میں دہلی کے تین کارپوریشنوں کو ضم کرنے کے مجوزہ بل پیش کیا گیا۔وزیر مملکت برائے داخلہ نتیانند رائے نے ’’دہلی میونسپل کارپوریشن (ترمیمی) بل 2022‘‘پیش کرتے ہوئے کہا کہ اس بل کی منظوری سے دہلی کے بلدیاتی نظام میں یکسانیت آئے گی، پالیسیاں ٹھوس ہوں گی اور ملازمین کی تنخواہوں کی ادائیگی جیسے مسائل حل ہوں گے۔ انہوں نے کہا کہ یہ بل دہلی والوں کے مفاد میں ہے۔کانگریس اور ریوولیوشنری سوشلسٹ پارٹی اور بہوجن سماج پارٹی نے بل کی مخالفت کرتے ہوئے کہا کہ یہ حکمراں پارٹی کی طرف سے قومی دارالحکومت میں بلدیاتی انتخابات کو ملتوی کرنے کی سازش ہے۔عام آدمی پارٹی نے بھی اس بل کی مخالفت کی ہے، اگرچہ پارٹی کے رکن اسمبلی بھگونت مان کے پنجاب کے وزیر اعلیٰ بننے کے بعد پارٹی کا ایوان میں کوئی رکن نہیں ہے۔
کانگریس کے منیش تیواری نے بل کو پارلیمنٹ کے دائرہ اختیار سے باہر قرار دیا۔ ایس پی کے این کے پریم چندرن، کانگریس کے گورو گوگوئی اور بی ایس پی کے رتیش پانڈے نے بل پر اعتراض کیا اور اسے حکومت کی من مانی قرار دیا۔واضح ر ہے کہ دہلی میں 2012 میں ایک دہلی میونسپل کارپوریشن (ایم سی ڈی) کو تقسیم کرکے جنوبی دہلی، مشرقی دہلی اور شمالی دہلی میونسپل کارپوریشنز کا قیام عمل میں آیا تھا۔ دہلی میں حکمراں عام آدمی پارٹی بھی اس کی مخالفت کرتی رہی ہے۔ ان اداروں کو یکجا کرنے کا فیصلہ بلدیاتی انتخابات سے عین قبل کیا گیا ہے۔ اس بل کی منظوری کابینہ کے گزشتہ اجلاس میں دی گئی تھی۔اس وقت دہلی کے تینوں کارپوریشنوں میں 272 وارڈ ہیں، جب کہ اس بل میں ان کو 250 تک محدود کرنے کا التزام رکھا گیا ہے۔ سال 2007 میں دہلی کے میونسپل کارپوریشن میں وارڈوں کی کل تعداد 134 تھی جسے 2012 میں بڑھا کر 272 کر دیا گیا تھا۔