Taasir Urdu News Network – Syed M Hassan 16th Sept
رانچی، 16 ستمبر:۔ بہار کے سابق وزیر اعلی لالو پرساد یادو کے علاج کے لیے سنگاپور جانے کا راستہ صاف ہو گیا ہے۔ سی بی آئی کے خصوصی جج نے ان کے پاسپورٹ کو جاری کرنے کی اجازت دے دی ہے۔
جمعہ کو سی بی آئی کے خصوصی جج دنیش رائے کورٹ نے لالو پرساد یادو کے پاسپورٹ کی ریلیز کی درخواست پر سماعت کی۔ دونوں فریقوں کو سننے کے بعد عدالت نے لالو پرساد کا پاسپورٹ جاری کرنے کا حکم دیا۔ جھارکھنڈ ہائی کورٹ کے وکیل پربھات کمار، اننت کمار وج اور دیورشی منڈل نے سی بی آئی عدالت میں لالو کی طرف سے بحث کی۔ عدالت کی جانب سے پاسپورٹ کی ریلیز کی اجازت کے بعد آر جے ڈی لیڈر لالو پرساد یادو کے لیے اپنے گردے کے علاج کے لیے سنگاپور جانے کا راستہ صاف ہوگیا ہے۔
لالو کے وکیل پربھات کمار نے کہا کہ انہوں نے 24 ستمبر کو سنگاپور کے اسپتال میں اپنے علاج کے لیے ایک اپوائنٹمنٹ لیا ہے لیکن قانونی رکاوٹوں کی وجہ سے وہ عدالت کی اجازت کے بغیر بیرون ملک نہیں جاسکتے تھے۔ اس لیے انہوں نے سی بی آئی کورٹ سے پاسپورٹ ریلیز کرنے کی اجازت مانگی تھی۔ انہوں نے بتایا کہ جمعہ کو سماعت کے بعد عدالت نے لالو کا پاسپورٹ جاری کرنے کا حکم جاری کیا ہے۔
اس سے پہلے 13 ستمبر کو بھی لالو یادو کی جانب سے سی بی آئی کورٹ سے پاسپورٹ جاری کرنے کی اجازت مانگی گئی تھی۔ قابل ذکر ہے کہ اس سے پہلے 31 اگست کو چارہ گھوٹالہ معاملے میں مختلف مقدمات میں سزا یافتہ لالو نے سی بی آئی عدالت میں اپنے پاسپورٹ کی تجدید کروانے کے بعد جمع کرایا تھا۔ لالو چارہ گھوٹالہ کے پانچ مقدمات میں مجرم ٹھہرائے گئے ہیں اور فی الحال تمام معاملات میں ضمانت پر باہر ہیں۔