Taasir Urdu News Network – Syed M Hassan 15 th Dec.

لاہور ،15دسمبر:پاکستانی کرکٹ ٹیم کے سابق اسپنر سعید اجمل کا کہنا ہے کہ مجھے انگلش لینگویج سے فطری نفرت ہے۔سماجی رابطے کی ویب سائٹ ٹوئٹر پر گردش کرنے والی ویڈیو میں سعید اجمل نے کہا کہ مجھے انگلش نہیں آتی، جب میں ورلڈ نمبر ون بنا تو مجھے بڑے لوگوں نے کہا کہ انگریزی میں بات کریں۔انہوں نے کہا کہ میں ان کو جواب دیا کہ میری مرضی میں جو کروں، میں انگریزی میں بات نہیں کروں گا، اگر آپ کو میری قومی زبان میں مجھ سے انٹرویو کرنا ہے تو کریں۔سعید اجمل نے اپنی بات جاری رکھتے ہوئے کہا کہ جو ہم کر رہے ہیں وہ پوری دنیا دیکھ رہی ہے یہ عام بندہ نہیں کہہ رہا ہے۔ دنیا میں ورلڈ نمبر ون کا مطلب ورلڈ نمبر ون ہے، تو دنیا کو آپ کے پاس آنا چاہیے۔ان کا مزید کہنا ہے کہ انگلش لینگویج سے ہی مجھے فطری نفرت ہے، اگر آپ کو انگلش نہیں آتی تو آپ برے ہیں اور اگر آپ کو آتی ہے تو آپ دنیا کے اچھے انسان ہیں ۔سابق کھلاڑی کا یہ بھی کہنا ہے کہ کرکٹ کے کیریئر کو انگلش سے کیوں جوڑ اجاتا ہے؟آپ کا جو کیریئر ہے وہ دنیا کا سب سے اچھا ہے، آپ کی جو زبان ہے ،آپ اس سے برا بھی اور اچھا بھی کام کر سکتے ہیں۔