Taasir Urdu News Network – Syed M Hassan 9 th Dec.
نئی دہلی، 09 دسمبر: سیکیورٹی فورسز نے ایک بار پھر پاکستان کے منشیات اور ہتھیار بھیجنے کے مذموم عزائم کو ناکام بنا دیا ہے۔بارڈر سیکیورٹی فورس (بی ایس ایف) نے پنجاب کے فیروز پور میں ہندپاک سرحد سے 2.5 کلو سے زیادہ ہیروئن اور اسلحہ برآمد کیا ہے۔ معلومات کے مطابق گھنی دھند کی وجہ سے اسمگلروں نے سرحد پر اپنی سرگرمیاں بڑھا دی ہیں۔ یہ جانکاری بی ایس ایف نے دی ہے۔ بی ایس ایف نے بتایا کہ ان کے جوانوں نے فیروز پور کے ڈی ٹی مال گاؤں میں سرحد پر خاردار باڑ کے قریب سے دو کلو 616 گرام ہیروئن، ایک پستول، ایک میگزین اور چھ کارتوس برآمد کیے۔ذرائع کے مطابق، بارڈر سیکورٹی فورس کے اہلکاروں نے سرحدی باڑ کے سامنے ایریا ڈومینیشن پٹرولنگ کرتے ہوئے، آئی بی ٹریک پر کچھ مشکوک قدموں کے نشانات دیکھے۔بی ایس ایف نے بتایا کہ اس کے بعد پورے علاقے کی تلاشی کے دوران جوانوں کو نیلے رنگ کے دو مشکوک پیکٹ ملے۔ پیکٹ کھولنے پر بی ایس ایف اہلکاروں کو ہیروئن کے آٹھ پیکٹ ملے جن کا کل وزن تقریباً 2.616 کلو گرام ہے۔ ایک پستول، ایک میگزین اور چھ کارتوس بھی برآمد ہوئے ہیں۔اہم بات یہ ہے کہ ان دنوں گھنی دھند کی وجہ سے سرحد پر پاکستانی اسمگلروں کی سرگرمیاں بڑھ گئی ہیں۔ اس دوران اکثر ڈرون کے ذریعے اسلحہ اور منشیات بھیجنے کے واقعات منظر عام پر آتے رہتے ہیں۔ لیکن اعلیٰ ٹیکنالوجی اور مسلسل گشت کی وجہ سے بی ایس ایف ان کے منصوبوں کو کافی حد تک ناکام بنا رہی ہے۔
