Taasir Urdu News Network – Syed M Hassan 4th Feb

پٹنہ،04فروری: بہار میں موتیہاری پولس کی مدد سے این آئی اے نے ہفتہ کی صبح چکیہ سب ڈویژن علاقہ سے پی ایف آئی کے 3 مشتبہ افراد کو حراست میں لیا ہے۔ بہار پولس اور مرکزی ایجنسیاں مشترکہ طور پر پوچھ گچھ کر رہی ہیں۔ مشرقی چمپارن کے پولیس سپرنٹنڈنٹ کانتیش کمار نے بتایا کہ این آئی اے پٹنہ، رانچی اور مقامی پولیس نے ایک اطلاع کی بنیاد پر انہیں پکڑا ہے۔ ابھی ان تینوں کی شناخت بھی نہیں بتائی جا سکتی۔ انکوائری کے بعد ہی اس معاملے میں کوئی بھی معلومات دی جائیں گی۔ملک گیر چھاپوں کے دو دور اور پاپولر فرنٹ آف انڈیا (پی ایف آئی ) کے 240 سے زیادہ رہنماؤں اور عہدیداروں کی گرفتاری کے بعد، مرکزی حکومت نے ستمبر 2022 میں تنظیم پر پانچ سال کے لیے پابندی لگا دی تھی۔ ایک سرکاری نوٹیفکیشن میں کہا گیا ہے کہ پی ایف آئی اور اس سے وابستہ تنظیموں یا محاذوں کو غیر قانونی سرگرمیاں (روک تھام) ایکٹ (یو اے پی اے ) کے تحت فوری اثر سے “غیر قانونی انجمنیں” قرار دیا گیا ہے۔دوسری جانب پاپولر فرنٹ آف انڈیا (پی ایف آئی) پر مبینہ دہشت گردانہ سرگرمیوں کے لیے پابندی کو اس کی طلبہ ونگ عدالت میں چیلنج کرے گی۔ طلبہ ونگ نے اس ونگ کو “غیر جمہوری” اور “غیر آئینی” قرار دیا۔ اس معاملے پر مختلف سیاسی جماعتوں نے ردعمل ظاہر کیا ہے۔