Taasir Urdu News Network – Syed M Hassan 3rd Feb

نئی دہلی،03فروری : ڈائریکٹوریٹ جنرل آف سول ایوی ایشن (ڈی جی سی اے) نے انکوائری کا حکم دیا ہے جب ایک مسافر غلطی سے پٹنہ جانے والی انڈیگو کی پرواز کے بجائے ایئر لائن کی دوسری پرواز میں سوار ہوا اور اپنی منزل سے 1400 کلومیٹر دور ادے پور پہنچ گیا۔ واقعہ 30 جنوری کا بتایا جا رہا ہے اور اس مسافر کو اگلے دن اس کی منزل کی طرف روانہ کر دیا گیا۔ ڈی جی سی اے کے ایک سینئر افسر نے بتایا کہ مسافر کی شناخت افسر حسین کے طور پر ہوئی ہے۔ اس نے انڈیگو کی فلائٹ 6E-214 کے ذریعے پٹنہ کا ٹکٹ بک کرایا اور 30 جنوری کو طے شدہ فلائٹ میں سوار ہونے کے لیے دہلی ایئرپورٹ پہنچا لیکن غلطی سے وہ اسی ایئر لائن کی پرواز 6E-319 میں سوار ہو کر ادے پور گیا۔ اس مسافر کو ادے پور ایئرپورٹ پر اتارنے کے بعد اسے اپنی غلطی کا احساس ہوا۔اس کے بعد اس نے ادے پور ہوائی اڈے کے حکام کو اس کی اطلاع دی جنہوں نے ایئر لائن کو اس بارے میں الرٹ کر دیا۔ ایئر لائن کی جانب سے مسافر کو اسی دن دہلی اور اگلے دن یعنی 31 جنوری کو پٹنہ بھیجا گیا تھا۔ ڈی جی سی اے اہلکار نے کہا کہ ہم اس معاملے میں رپورٹ طلب کر رہے ہیں اور ایئر لائن کے خلاف مناسب کارروائی کی جائے گی۔ جانچ میں ڈی جی سی اے یہ جاننے کی کوشش کرے گا کہ مسافر کے بورڈنگ پاس کو ٹھیک سے اسکین کیوں نہیں کیا گیا؟ انہوں نے کہا کہ بورڈنگ پاس کو بورڈنگ سے قبل قواعد کے مطابق دو پوائنٹس پر چیک کیا جاتا ہے تو پھر وہ غلط فلائٹ میں کیسے سوار ہوئے؟دوسری طرف، ایئر لائن کی طرف سے جمعہ کو جاری کردہ بیان میں کہا گیا ہے ہم اس واقعے سے واقف ہیں جو 6E319 دہلی،ادے پور فلائٹ میں ایک مسافر کے ساتھ پیش آیا۔ ہم اس معاملے میں حکام سے بات کر رہے ہیں۔ ہم مسافروں کو ہونے والی تکلیف کے لیے معذرت خواہ ہیں۔انڈیگو کی فلائٹ میں گزشتہ 20 دنوں میں اس طرح کا یہ دوسرا واقعہ ہے۔ اس سے قبل 13 جنوری کو ایک مسافر، جس کے پاس ایئر لائن کا ٹکٹ اور بورڈنگ پاس تھا۔ اندور جانے والی فلائٹ کے لیے غلط فلائٹ میں سوار ہوئے اور ناگپور پہنچے۔