Taasir Urdu News Network – Syed M Hassan 18th March

علی گڑھ، 18 مارچ:علی گڑھ مسلم یونیورسٹی کے بیگم عزیز النساء￿ ہال میں سالانہ ہال ہفتہ بعنوان ’’نور امروز‘‘ کے تحت متعدد ثقافتی و ادبی پروگراموں کا اہتمام کیا گیا۔ پینٹنگ اور گلوکاری کے پروگرام بھی ہوئے۔ افتتاحی تقریب کے مہمان خصوصی پروفیسر محمد گلریز، پرو وائس چانسلر، اے ایم یو اور مہمان اعزازی اے ایم یو رجسٹرار مسٹر محمد عمران آئی پی ایس تھے۔
افتتاحی خطاب میں پروفیسر محمد گلریز نے طالبات کی انفرادی اور پیشہ ورانہ ترقی میں غیر نصابی سرگرمیوں کی اہمیت پر زور دیا، جبکہ مسٹر محمد عمران آئی پی ایس نے مجموعی کردار سازی میں ثقافتی و ادبی سرگرمیوں کی اہمیت واضح کی۔
پرووسٹ پروفیسر صبوحی خان نے طالبات کی حوصلہ افزائی کرتے ہوئے کہاکہ وہ مختلف سرگرمیوں میں اپنی صلاحیتوں کو نکھارنے پر توجہ مرکوز کریں۔ دوّیا ورما کے پیش کردہ ثقافتی پروگرام اور غیر ملکی زبانوں میں گیت اور نظم خوانی کو کافی سراہا گیا۔ ہال میں مقیم طالبات کی تخلیقی و فنی صلاحیتوں اور اختراعات کو سامنے لانے کے لیے مختلف قسم کے مقابلے منعقد کیے گئے۔ نیچرل لائف کی بانی اور ڈائریکٹر محترمہ فرح سروش نے دماغی صحت کی دیکھ بھال پر لیکچر دیا۔ انھوں نے کہا کہ نہ صرف ذاتی زندگی بلکہ پیشہ ورانہ اور تعلیمی کیریئر میں بھی اچھی دماغی صحت کی اہمیت سے کسی کو انکار نہیں ہوسکتا۔
ہال ہفتہ کی اختتامی تقریب میں پروفیسر نعیمہ خاتون، پرنسپل، ویمنس کالج نے بطور مہمان خصوصی شرکت کی، جبکہ یوجی سی ایچ آردی سی کی ڈائریکٹر ڈاکٹر فائزہ عباسی مہمان اعزازی تھیں۔ اس موقع پر پرووسٹ پروفیسر صبوحی خان نے مختلف تعلیمی اور پیشہ ورانہ شعبوں سے وابستہ مہمانوں کی عزت افزائی کی۔ آخری دن دیوانشی سینی نے اینی بیسنٹ کی لائیو پینٹنگ سیشن کا اہتمام کیا۔ اس کے علاوہ علمہ چودھری اور ان کی ٹیم نے ایک مختصر ڈراما ’’تشدد کی کوئی جنس نہیں ہوتی‘‘کے عنوان سے پیش کیا۔ محترمہ علیشا ابکار، جنرل وارڈن نے اپنے خطبہ استقبالیہ میں مہمانوں کا تعارف کرایا۔ ثقافتی تقریبات کا اہتمام کلچرل اور جوائنٹ کلچرل سکریٹری مس دوّیا اور مس علمہ نے کیا جبکہ ادبی تقریبات کا اہتمام لٹریری اور جوائنٹ لٹریری سکریٹری مس ندا اور مس رمشا نے کیا تھا۔ جوائنٹ سینئر ہال مانیٹرمس تہمیش نے پروگرام کے انعقاد میں تعاون کیا۔ انتظامات کی دیکھ بھال مس انیسہ، سینئر فوڈ مانیٹر، اور مس شبنم علی، سینئر ڈسپلن مانیٹر ہال نے کی۔ ہال کی ادبی و ثقافتی وارڈن ڈاکٹر فوزیہ فریدی نے کلماتِ تشکر ادا کئے۔ محترمہ رباب خان، ڈاکٹر زیبا عظمت، ڈاکٹر بشریٰ، ڈاکٹر زرین عمران، محترمہ رفیدہ صدیقی، محترمہ نازیہ بیگم، محترمہ صدف، ڈاکٹر جیوتی کسمبل، ڈاکٹر ادیبہ اور ڈاکٹر صوفیہ عظیم پر مشتمل وارڈنوں کی ٹیم اور ہال کمیٹی کے ارکان نے پروگراموں کی منصوبہ بندی اور انعقاد میں اہم کردار نبھایا۔