TAASIR NEWS NETWORK- SYED M HASSAN –25 MAY
نئی دہلی، 25 مئی: گینگسٹر لارنس بشنوئی کو بدھ کی رات گجرات جیل سے دہلی لایا گیا۔ انہیں سخت سیکورٹی میں منڈولی جیل میں رکھا گیا ہے۔ جیل انتظامیہ نے جمعرات کو کیس کی تصدیق کی ہے۔ جیل میں ان کی حفاظت کے لیے خصوصی انتظامات کیے گئے ہیں۔ حالانکہ اس سے قبل انہیں تہاڑ جیل میں رکھنے کا منصوبہ تھا اور اس کی تیاریاں بھی شروع کر دی گئی تھیں لیکن گزشتہ دنوں گینگسٹرٹلو تاجپوریا کے قتل کیس کے پیش نظر آخری وقت میں اسے منڈولی جیل منتقل کر دیا گیا ۔ اس کی وجہ سیکورٹی بتائی جاتی ہے۔
جیل ذرائع کے مطابق اسے منڈولی جیل کے ہائی سکیورٹی وارڈ کے سیل نمبر 15 میں رکھا گیا ہے۔ اسے کل رات سخت سیکورٹی کے درمیان گجرات سے دہلی لایا گیا ۔ این آئی اے اسے پوچھ گچھ کے لیے احمد آباد لے گئی جہاں سے این آئی اے کو اس کے ڈرگ سنڈیکیٹ کے بارے میں کافی معلومات ملی۔ اس سلسلے میں اسے احمد آباد لے جایا گیاتھا۔
خوفناک گینگسٹر بشنوئی کے خلاف 50 سے زیادہ سنگین مجرمانہ مقدمات درج ہیں۔ اس بات کا اعتراف اس نے گزشتہ دنوں ایک نجی ٹی وی چینل کو دیے گئے انٹرویو میں خود کیا۔ بہت سے لوگوں کو مارنے کے ساتھ ساتھ سرحد پر منشیات کی اسمگلنگ کے بھی کئی واقعات ہیں۔ لارنس بشنوئی گینگ کا شمالی ہندوستان کی ریاستوں میں کافی اثر و رسوخ ہے۔ اس میں دہلی، پنجاب، یوپی، ہریانہ اور راجستھان سمیت کئی ریاستیں شامل ہیں۔ زیادہ تر مقدمات پنجاب کے مختلف اضلاع میں درج ہیں۔ مختلف ریاستوں میں اس کے 700 سے زیادہ گرگے ہیں، جو اس کے کہنے پر کسی کو بھی مار سکتے ہیں۔
