تاثیر،۱۸ نومبر۲۰۲۳:- ایس -ایم- حسن
احمد آباد، 18نومبر: پی ایم مودی اور آسٹریلیا کے وزیر اعظم انتھونی البانیس، نائب وزیر اعظم رچرڈ مارلس اتوار کو ہندوستان اور آسٹریلیا کے درمیان کھیلے جانے والے ورلڈ کپ کرکٹ فائنل کو دیکھنے کے لیے پہنچ رہے ہیں۔ گجرات کے وزیر اعلی بھوپیندر پٹیل نے جمعہ کو گاندھی نگر میں ایک اعلیٰ سطحی میٹنگ کی تاکہ موٹیرا کے نریندر مودی اسٹیڈیم میں کھیلے جانے والے میچ کی سیکورٹی اور دیگر انتظامات کی نگرانی کی جاسکے۔ پٹیل نے سینئر عہدیداروں کے ساتھ سیکورٹی اور دیگر انتظامات کا جائزہ لیا۔ ہندوستان، آسٹریلیا اور دنیا بھر سے کرکٹ شائقین اتوار کو آئی سی سی ورلڈ کپ 2023 کا ہندوستان بمقابلہ آسٹریلیا فائنل دیکھنے کے لیے احمد آباد کے نریندر مودی اسٹیڈیم پہنچ چکے ہیں۔تہوار کے موسم اور ورلڈ کپ کے فائنل میچ کی وجہ سے احمد آباد شہر میں بے مثال ہجوم کی وجہ سے شہر کے لیے ہوائی کرایہ اور ہوٹل کے کرایے آسمان کو چھو رہے ہیں۔ دہلی اور ممبئی سے احمد آباد تک کی پروازوں کے ہوائی ٹکٹ عام طور پر 8,000 سے 10,000 روپے میں دستیاب ہوتے ہیں چاہے آخری لمحات میں بک کروایا جائے۔ جبکہ آن لائن ٹریول پورٹلز کے مطابق 18 سے 20 نومبر تک یہ ہوائی کرایوں میں 300 فیصد اضافہ ہو کر بالترتیب 43 ہزار اور 31 ہزار روپے ہو گیا ہے۔ دوسرے شہروں سے ہوائی کرایہ میں بھی عام دنوں کے مقابلے میں کم از کم 150-200 فیصد اضافہ ہوا ہے۔ بی سی سی آئی کے مطابق آدتیہ گڑھوی پہلی اننگز کے ڈرنکس بریک کے دوران پرفارم کرتے نظر آئیں گے۔ پہلی اننگز کے اختتام کے بعد آدھے گھنٹے کے وقفے کے دوران میوزک ڈائریکٹر پریتم چکرورتی، جونیتا گاندھی، نقاش عزیز، امیت مشرا، آکاسا سنگھ اور تشار جوشی پرفارم کریں گے۔پی ایم نریندر مودی کے اسٹیڈیم میں ورلڈ کپ فائنل میچ دیکھنے کی امید ہے۔ اس کے علاوہ شہر میں اسپورٹس لیجنڈز، بزنس ٹائیکونز، بالی ووڈ کی مشہور شخصیات اور موسیقاروں کی آمد متوقع ہے اور فائنل میچ ستاروں سے سجے گا۔ میڈیا رپورٹس کے مطابق بھارت اور آسٹریلیا کے درمیان ہونے والے اس فائنل میچ کو دیکھنے 8 ریاستوں کے وزرائے اعلیٰ بھی آ سکتے ہیں۔