’حماس کیساتھ جنگ اختتام کے قریب‘، نیتن یاہو نے جنگ کو لبنان منتقل کرنیکا اشارہ دیدیا

تاثیر۲۴      جون ۲۰۲۴:- ایس -ایم- حسن

تل ابیب، 24 جون: اسرائیلی وزیراعظم نیتن یاہو نے کہا ہے کہ حماس کے ساتھ سخت جنگ کا مرحلہ اختتام کے قریب ہے، ساتھ ہی صیہونی ریاست کے سربراہ نے جنگ کو لبنان سرحد پر منتقل کرنے کا اشارہ بھی دے دیا۔مغویوں کی رہائی کے لیے حماس کے ساتھ جزوی ڈیل پر تیار نیتن یاہو کا کہنا ہے کہ سیزفائر معاہدے کے باوجود حماس کے خاتمے کا مشن جاری رکھیں گے۔حماس نے اسرائیلی وزیراعظم کے بیان پر اپنے ردعمل میں کہا کہ جزوی ڈیل کا مطلب ہے کہ نیتن یاہو نے امریکی صدر کا سیز فائر منصوبہ مسترد کردیا ہے۔حماس نے کسی بھی معاہدے کیلیے مکمل جنگ بندی اور قابض فوج کے مکمل انخلا پر زور دیا ہے۔دوسری جانب اسرائیلی فوج کی غزہ کے رہائشی علاقوں میں بمباری جاری ہے جس میں خواتین، بچوں سمیت مزید 15 فلسطینی شہید ہوگئے۔اسرائیلی طیاروں کی جانب سے اقوام متحدہ کی امدادی ایجنسی کے مرکز کو بھی نشانہ بنایا گیا جس میں امدادی مرکز میں پناہ لیے ہوئے 8 بے گھر فلسطینی شہید ہوگئے، گزشتہ 24 گھنٹوں میں مزید 50 سے زیادہ فلسطینی شہید ہوئے۔7 اکتوبر سے اب تک فلسطینی شہدا کی تعداد 37 ہزار 600 تک پہنچ گئی ہے جبکہ 86 ہزار سے زیادہ فلسطینی زخمی ہیں۔ حماس نے رفح میں اسرائیلی فوجیوں اور گاڑیوں کو نشانہ بنایا جبکہ جنوبی لبنان سے حزب اللہ نے شمالی اسرائیل میں اسرائیلی فوجی ہیڈکوارٹرز پر ڈرون حملہ کیا جس میں ایک اسرائیلی فوجی شدید زخمی ہوگیا۔