تاثیر 29 دسمبر ۲۰۲۴:- ایس -ایم- حسن
بہار شریف29 دسمبر(محمد دانش) نالندہ ضلع کے صدر دفتر مصطفی پور میں آسا پارٹی کی ریاستی سطح کی میٹنگ کا انعقاد کیا گیا۔ ریاستی صدر، ضلع صدر اور دیگر سینئر لیڈران بشمول بہار کے 534 بلاک صدور نے میٹنگ میں حصہ لیا۔ پارٹی کے قومی صدر آر سی پی سنگھ نے میٹنگ کی صدارت کرتے ہوئے تنظیم کی مضبوطی اور آئندہ اسمبلی انتخابات کے لیے حکمت عملی پر تفصیل سے تبادلہ خیال کیا۔میٹنگ کے دوران میڈیا سے خطاب کرتے ہوئے قومی صدر آر سی پی سنگھ نے بی پی ایس سی امتحان کو لے کر طلبہ میں پھیلائی گئی غلط فہمیوں پر تشویش کا اظہار کیا۔انہوں نے کہا کہ طلباء سے بات چیت کرنا اور ان کے مسائل حل کرنا حکومت کی ذمہ داری ہے۔ بی پی ایس سی امتحان پر طلبہ کا اعتماد ختم ہونا حکومت کے لیے ایک سنگین اشارہ ہے۔اس کا فوری حل نکالا جائے۔ آر سی پی سنگھ نے وزیر اعلیٰ نتیش کمار پر طنز کرتے ہوئے کہا کہ پہلے نتیش کمار کو کوئی ہائی جیک نہیں کر سکتا لیکن اس وقت کچھ لوگوں نے ان کی قیادت پر غیر قانونی قبضہ کر رکھا ہے۔آسا پارٹی کے قومی نائب صدر و ترجمان پنچم سایواستو، پارٹی کے قومی نائب صدر جناب منا صدیقی،خزانچی بپین کماریادو، قومی ترجمان اوپیندر کمار وبھوتی نے کہا کہ پارٹی نے آئندہ اسمبلی انتخابات کے لیے کئی اہم حکمت عملی بنائی ہے۔ اس موقع پر میٹنگ میں اے ایس اے پارٹی کے ریاستی صدر پریتم سنگھ، ضلع صدر کمار آنند سنہا کے ساتھ دیگر سینئر لیڈران جیسے ڈاکٹر پریہ درشی اشوک، ونود مکھیا، للیتا کماری، چپپو سنگھ، اجے یادو، بٹو چندراونشی، امریش پٹیل اور سنجے پٹیل وغیرہ موجود تھے۔