تاثیر 06 جنوری ۲۰۲۵:- ایس -ایم- حسن
دہرادون، 06 جنوری: وزیر اعلی پشکر سنگھ دھامی نے پیر کو نئی دہلی میں وزیر اعظم نریندر مودی سے بشکریہ ملاقات کی۔ اس دوران انہوں نے وزیر اعظم کو اتراکھنڈ میں منعقد ہونے والے قومی کھیلوں میں شرکت کی دعوت دی اور انہیں مالاری (چمولی) کی شال اور نارائن آشرم کی نقل پیش کی۔وزیر اعلیٰ نے ریاست کی ترقی میں وزیر اعظم کی قیادت اور تعاون کے لیے ریاست کے عوام کی جانب سے شکریہ ادا کیا۔ انہوں نے ریاست میں جاری ترقیاتی منصوبوں کی پیش رفت اور مستقبل کے منصوبوں پر تبادلہ خیال کیا۔
وزیر اعلیٰ نے کہا کہ رشی کیش کرن پریاگ ریل پروجیکٹ کے پہلے مرحلے پر کام تیز رفتاری سے جاری ہے اور تانک پور-باگیشور ریل پروجیکٹ کا سروے مکمل ہو چکا ہے۔ انہوں نے ان پروجیکٹوں کی منظوری اور مالی اخراجات مرکزی حکومت سے برداشت کرنے پر زور دیا۔وزیر اعلیٰ نے رشیکیش کے پرانے ریلوے اسٹیشن کو بند کرنے اور نئے یوگ نگری ریلوے اسٹیشن سے تمام ٹرینوں کو چلانے کی درخواست کی۔ پرانے اسٹیشن کی اراضی کو روڈ ٹریفک کی بہتری کے لیے استعمال کرنے کی تجویز بھی دی گئی۔