ایڈوکیٹ اشتیاق احمد کی طرف سے دعوتِ افطار کا شاندار اہتمام کیا گیا

مظفرپور:13 مارچ(پریس ریلیز)مشہور و معروف سماجی رہنما، انصاف منچ مظفرپور کے خازن، اعجاز احمد کی قیادت میں سعدپورہ ریلوے کراسنگ پر واقع “رضی منزل” میں ایک روح پرور دعوتِ افطار کا اہتمام کیا گیا۔ اس بابرکت محفل میں شہر کے معززین، علماء کرام، سماجی کارکنان، دانشوران، وکلاء اور نوجوانوں کی بڑی تعداد نے شرکت کی۔اس موقع پر انکم ٹیکس و سیل ٹیکس امور کے ماہر وکیل اور سماجی رہنما، ایڈوکیٹ اشتیاق احمد نے رمضان المبارک کی اہمیت پر تفصیلی روشنی ڈالی۔ انہوں نے کہا کہ یہ مقدس مہینہ ہمیں ایثار، قربانی، صبر اور تقویٰ کا درس دیتا ہے۔ روزہ محض بھوک اور پیاس کا نام نہیں بلکہ یہ روحانی تربیت کا ایک ذریعہ ہے، جو ہمیں صبر، برداشت، اور دوسروں کے حقوق کا احترام سکھاتا ہے۔ انہوں نے مزید کہا کہ رمضان کا حقیقی مقصد صرف عبادات تک محدود نہیں بلکہ یہ ہمیں اپنی زندگی کو نیکی، محبت، اور خدمتِ خلق کے اصولوں پر استوار کرنے کی دعوت دیتا ہے۔  دعوتِ افطار کے دوران انصاف منچ کے خازن، اعجاز احمد نے بھی خطاب کرتے ہوئے کہا کہ رمضان المبارک ہمیں بھائی چارے اور سماجی ہم آہنگی کا درس دیتا ہے۔ یہ مہینہ ہمیں ضرورت مندوں کی مدد، غریبوں کے دکھ درد کو بانٹنے اور سماجی خدمت کے جذبے کو فروغ دینے کی تلقین کرتا ہے۔ انہوں نے کہا کہ ہم سب کو چاہیے کہ ہم اپنی حیثیت کے مطابق زیادہ سے زیادہ لوگوں کی مدد کریں، تاکہ کوئی بھی فرد محرومی کا شکار نہ ہو۔افطار تقریب میں شریک افراد نے اس روحانی محفل کو انتہائی مؤثر اور متاثر کن قرار دیا۔ کئی شرکاء نے کہا کہ ایسی تقریبات سماجی تعلقات کو مضبوط بنانے کے ساتھ ساتھ ہمیں دین کی بنیادی تعلیمات سے روشناس کراتی ہیں۔ آفتاب عالم نے کہا کہ رمضان میں اس طرح کی محافل ہمیں دین کی روحانی برکتوں کو محسوس کرنے اور دوسروں کی خدمت کے لیے متحرک ہونے کا موقع فراہم کرتی ہیں۔