تاثیر 12 اپریل ۲۰۲۵:- ایس -ایم- حسن
کولکاتا، 12 اپریل :مغربی بنگال کی وزیر اعلیٰ ممتا بنرجی نے واضح کیا ہے کہ مرکزی حکومت کے ذریعہ منظور کردہ نئے وقف ترمیمی ایکٹ کو کسی بھی حالت میں قبول نہیں کیا جائے گا۔ اس معاملے پر ریاست بھر میں احتجاج جاری ہے اور اسی سلسلے میں وزیر اعلیٰ بدھ 16 اپریل کو نیتا جی انڈور اسٹیڈیم میں اماموں اور مسلم طبقے کے دیگر نمائندوں کے ساتھ ایک اہم میٹنگ کرنے والی ہیں۔ذرائع کے مطابق اس میٹنگ میں ممتا بنرجی مرکزی حکومت کے اس فیصلے کے خلاف اقلیتی برادری کو اگلا حکمت عملی پیغام دے سکتی ہیں۔ خیال کیا جاتا ہے کہ وہ سماج سے جمہوری طریقے سے احتجاج جاری رکھنے اور کسی بھی قسم کے تشدد سے دور رہنے کی اپیل کریں گی۔
ترنمول کانگریس پہلے ہی پارلیمنٹ میں اس ترمیم کے خلاف سخت مخالفت کا اظہار کر چکی ہے۔ پارٹی کا الزام ہے کہ مرکزی حکومت نے مشاورت کے بغیر زبردستی اس قانون کو منظور کر کے مذہبی جذبات کو ٹھیس پہنچائی ہے۔ ممتا بنرجی نے کہا ہے کہ اس قانون کے منفی اثرات کو بنگال میں لاگو نہیں ہونے دیا جائے گا۔
دریں اثناء جمعہ کو بھی ریاست کے مختلف اضلاع میں بڑے پیمانے پر احتجاجی مظاہرے ہوئے۔ کئی مقامات پر صورتحال کشیدہ ہوگئی۔ ترنمول کانگریس نے لوگوں سے اپیل کی ہے کہ وہ بھارتیہ جنتا پارٹی کی کسی بھی قسم کی اشتعال انگیز سیاست میں نہ پھنسیں اور امن برقرار رکھیں۔