ضلع مجسٹریٹ کی یقین دہانی کے بعد تعمیراتی کمیٹی کا احتجاجی دھرنا ختم

سیتامڑھی (مظفر عالم )

 ضلع کے اکھتا گھاٹ پر پل کی تعمیر کے مطالبہ کو لے کر کئی دنوں سے جاری دھرنا  ضلع مجسٹریٹ رچی پانڈے کی یقین دہانی کے بعد ختم ہو گیا۔ ضلع مجسٹریٹ نے خود دھرنے کے مقام پر پہنچ کر پل تعمیراتی کمیٹی کے ارکان اور مقامی کسانوں کے ساتھ بات چیت کی اور ان کے مسائل کو سنجیدگی سے سنا۔ ضلع مجسٹریٹ نے کمیٹی ممبران کو یقین دلایا کہ ان کے مطالبات کو برج کنسٹرکشن کارپوریشن لمیٹڈ کے چیئرمین اور روڈ کنسٹرکشن ڈیپارٹمنٹ کے ایڈیشنل چیف سیکرٹری تک پہنچایا جائے گا اور ان کے مسائل کے جلد حل کے لیے ضروری اقدامات کیے جائیں گے۔ ضلع مجسٹریٹ نے کہا کہ مفاد عامہ سے جڑے اس مسئلہ پر مثبت کارروائی کی جائے گی۔ موقع پر موجود برج کنسٹرکشن کارپوریشن لمیٹڈ کے عہدیداروں نے بتایا کہ محکمانہ منظوری ملتے ہی تعمیراتی کام شروع کردیا جائے گا۔ مجوزہ پل کی لمبائی تقریباً 1200 میٹر ہوگی جس میں اپروچ روڈ بھی شامل ہے۔ مقامی شہریوں نے بتایا کہ اس پل کی تعمیر سے تقریباً 50 گاؤں کے لوگوں کو براہ راست فائدہ پہنچے گا۔ ریگا شوگر مل کا فاصلہ کم ہو جائے گا، بیرگنیا اور موتیہاری کی طرف نقل و حرکت آسان ہو جائے گی، اور کسانوں کو دریا کے پار زرعی زمین تک آسان رسائی سے فائدہ پہنچے گا۔ اس موقع پر بی ڈی او سپی، برج کنسٹرکشن کارپوریشن کے افسران، ضلع پبلک ریلیشن آفیسر اور بڑی تعداد میں گاؤں کے لوگ موجود تھے۔ سرکردہ عوامی نمائندوں اور گاؤں والوں میں ست نارائن سنگھ،  راجنندن گاندھی، سکندر مہتو، شیو منگل ساہ، بدری بھگت، بھیکھاری ساہ اور دیگر معززین شامل تھے۔

ضلع مجسٹریٹ رچی پانڈے نے کہا کہ “حکومت عوامی جذبات کا احترام کرتی ہے، عوام کے مسائل حل کرنا انتظامیہ کی ترجیح ہے۔”