تاثیر 17 اکتوبر ۲۰۲۵:- ایس -ایم- حسن
حیدرآباد، 16 اکتوبر: تلنگانہ میں ایک بارپھرمسلمانوں کے جذبات شدید طور پر مجروح ہوئے ہیں۔ گستاخ راجہ سنگھ کے خلاف مسلسل بے عملی اور قانونی کارروائی نہ ہونے پر ریاست بھر میں مسلمانوں میں غم و غصہ پایا جا رہاہے۔ مختلف شہروں اور اضلاع میں عوامی سطح پر احتجاج کی فضا دیکھی جا رہی ہے۔ تلنگانہ کے جید علمائے کرام، مسلم دانشوران اور سیاسی رہنماؤں پر مشتمل ایک اعلیٰ سطحی وفد نے جمعرات کے روز ریاست کے ڈائریکٹر جنرل آف پولیس (ڈی جی پی) شیودھرریڈی سے ملاقات کی۔ وفد نے ملعون راجہ سنگھ کے خلاف سخت ترین قانونی کارروائی اور فوری گرفتاری کا مطالبہ کیا۔
وفد نے کہا کہ مسلمانوں کے ایمان اور غیرتِ ایمانی کا تقاضا ہے کہ رسول اللہ ٔ کی شان میں کسی بھی قسم کی گستاخی ہرگز برداشت نہیں کی جاسکتی۔ علما نے واضح طور پر کہا کہ اگر حکومت نے اس معاملے میں خاموشی اختیار کی تو یہ خاموشی ناقابلِ قبول ہوگی اور عوامی ردعمل شدت اختیار کر سکتا ہے۔ وفد میں مولانا محمد حسام الدین ثانی عاقل جعفر پاشاہ، مولانا مفتی غیاث الدین رحمانی قاسمی، مولانا اکبر نظام الدین، مولاناحامد محمد خان، مفتی محمود زبیر، مولانا احسن الحمودی، ایم ایل اے مبین، ایم ایل سی رحمت بیگ اور دیگر اہم شخصیات شامل تھیں۔