Taasir Urdu News Network – Syed M Hassan 18th Feb
نئی دہلی، 17 فروری (ہ س)۔ ہندوستانی کرکٹ کنٹرول بورڈ (بی سی سی آئی) کے چیف سلیکٹر چیتن شرما نے جمعہ کو اپنے عہدے سے استعفیٰ دے دیا۔ بی سی سی آئی کے سکریٹری جے شاہ نے ان کا استعفیٰ قبول کر لیا ہے۔ اسٹنگ آپریشن کے بعد قومی سلیکشن کمیٹی کے چیئرمین کے طور پر چیتن شرما کی پوزیشن خطرے میں پڑ گئی تھی۔خیال کیا جاتا ہے کہ بی سی سی آئی کے اعلیٰ عہدیداروں نے چیتن کا اسٹنگ آپریشن میں پکڑا جانا پسند نہیں کیا۔ اسٹنگ آپریشن میں، شرما نے مبینہ طور پر وراٹ کوہلی، سورو گنگولی، روہت شرما، ہاردک پانڈیا اور ٹیم کے کئی دیگر کھلاڑیوں کے بارے میں کچھ تضحیک آمیز تبصرے کیے۔ حالانکہ بی سی سی آئی نے اس معاملے پر کوئی سرکاری بیان جاری نہیں کیا ہے۔اسٹنگ آپریشن میں شرما نے مبینہ طور پر ہیڈ کوچ راہل دراوڑ اور وراٹ کوہلی کے ساتھ اپنی اندرونی بات چیت کا انکشاف کیاتھا۔ شرما نے الزام لگایا تھا کہ بہت سے کھلاڑی 80 سے 85 فیصد فٹ ہونے کے باوجود مسابقتی کرکٹ میں واپسی کے لیے انجیکشن لگاتے ہیں۔ سابق ہندوستانی تیز گیند باز نے یہ بھی الزام لگایا کہ ستمبر میں آسٹریلیا کے خلاف ٹی۔20 سیریز کے لئے اسٹریس فریکچر سے بمراہ کی واپسی کو لے کر ان کے اور ٹیم انتظامیہ کے درمیان اختلافات تھے۔بمراہ ابھی تک ایکشن سے باہر ہیں۔ امکان ہے کہ وہ بارڈر-گواسکر سیریز اور اس کے بعد تین میچوں کی ون ڈے سیریز سے محروم رہیں گے۔ شرما نے یہ بھی الزام لگایا تھا کہ سابق کپتان کوہلی اور بی سی سی آئی کے سابق صدر سورو گنگولی کے درمیان انا کی جنگ تھی۔
