Taasir Urdu News Network – Syed M Hassan 29th March
لکھنؤ، 29 مارچ: سماج وادی پارٹی کے قومی صدر اکھلیش یادو نے کہا ہے کہ جب سے ریاست میں بی جے پی کی حکومت بنی ہے، کسانوں کی مسلسل تذلیل کی جا رہی ہے۔ انہیں دھوکہ دیا جا رہا ہے۔ ڑالہ باری اور بے وقت بارش سے کسانوں کی فصلوں کو کافی نقصان پہنچا، لیکن بی جے پی حکومت کسانوں کو ریلیف نہیں دے رہی ہے۔قرض اور مہنگائی سے پریشان کئی کسان خودکشی بھی کر چکے ہیں۔
بے موسم بارش اور ڑالہ باری سے ہر کسان کا نقصان ہوا۔ بی جے پی حکومت صرف دو تین ہزار معاوضہ دے کر ان کے زخموں پر نمک چھڑک رہی ہے۔ یہ کسانوں کی توہین نہیں تو اور کیا ہے؟ بی جے پی حکومت باغبانی کی فصلوں پر کوئی معاوضہ نہیں دے رہی ہے۔ بندیل کھنڈ میں 12 دنوں میں 5 کسانوں کی ڑالہ باری کی وجہ سے فصل کی تباہی کی وجہ سے موت ہوگئی۔ تین کسانوں نے خودکشی کر لی جبکہ دو کسانوں کو دل کا دورہ پڑا۔ بی جے پی حکومت کسانوں کے مفادات کے بجائے سرمایہ داروں سے ہمدردی رکھتی ہے۔ بی جے پی حکومت کی ‘فصل بیمہ اسکیم’ دھوکہ ثابت ہو رہی ہے۔ اس فصل بیمہ اسکیم سے انشورنس کمپنیاں فائدہ اٹھا رہی ہیں۔ بی جے پی حکومت انشورنس کے نام پر کسانوں کا حصہ نجی انشورنس کمپنیوں کو دے رہی ہے۔ معاوضہ اور کلیم کے نام پر انشورنس کمپنیاں کسانوں کو کلیم دینے سے گریزاں ہیں۔
