Taasir Urdu News Network – Syed M Hassan 14th March
اسلام آباد، 14 مارچ: پاکستان کے سابق وزیر اعظم عمران خان پر گرفتاری کی تلوار لٹک رہی ہے۔ دریں اثنا عمران خان نے 19 مارچ کو لاہور میں بڑی ریلی کا اعلان کیا ہے۔پیر کے روز دو مقدمات میں ناقابل ضمانت وارنٹ گرفتاری جاری ہونے کے بعد پولیس عمران کو گرفتار کرنے گئی۔ اس دوران عمران نے اپنے حامیوں کے ساتھ ایک بڑی ریلی نکال کر پولیس کو چیلنج کیا۔ وارنٹ گرفتاری توشہ خانہ کیس میں عدالت میں پیش نہیں ہونے اور گزشتہ سال ایک جلسہ عام کے دوران خاتون جج کو مبینہ طور پر دھمکی دینے پر جاری کیے گئے ہیں۔توشہ خانہ کیس کی سماعت کرنے والی اسلام آباد کی ڈسٹرکٹ اینڈ سیشن عدالت کے جج ظفر اقبال اور جج کو دھمکیاں دینے کے کیس میں سینئر سول جج رانا مجاہد رحیم نے پولیس سے کہا ہے کہ سابق وزیراعظم کو گرفتار کرکے عدالت میں پیش کیا جائے۔ عدالت نے انہیں توشہ خانہ کیس میں 18 مارچ اور جج کو دھمکی دینے کے کیس میں 21 مارچ کو عدالت میں پیش ہونے کی ہدایت کی۔
اب عمران خان کے حامی گرفتاری وارنٹکے خلاف ہائی کورٹ جانے کی تیاری کر رہے ہیں لیکن ان پر گرفتاری کی تلوار ابھی تک لٹک رہی ہے۔ ایسے میں پاکستان تحریک انصاف پارٹی کے سربراہ عمران خان نے 19 مارچ کو لاہور میں مینار پاکستان پر تاریخی ریلی کرنے کا اعلان کیا ہے۔ عمران خان نے عوام کو جلسے میں پہنچنے کی دعوت دیتے ہوئے کہا کہ سب کو مل کر جدوجہد کرنا ہوگی۔ انہوں نے 19 مارچ کو دوپہر 2 بجے مینار پاکستان پر جلوس نکالنے کا اعلان کیا۔