Taasir Urdu News Network – Syed M Hassan 03 March
دبئی، 3 مارچ (ہ س)۔ آسٹریلیا نے اندور میں تیسرے ٹیسٹ میں بھارت کو 9 وکٹوں سے شکست دے کر اس سال کی آئی سی سی ورلڈ ٹیسٹ چمپئن شپ (ڈبلیو ٹی سی) فائنل میں جگہ بنا لی، حالانکہ دوسرے نمبر کے لیے بھارت اور سری لنکا کے درمیان دلچسپ جنگ جاری ہے۔آسٹریلیائی ٹیم اس ورلڈ ٹیسٹ چمپئن شپ کی مدت (2021-23) کے دوران بہترین فارم میں رہی ہے۔ پیٹ کمنز کی ٹیم نے اس عرصے کے دوران 18 میں سے 11 ٹیسٹ میچ جیتے ہیں۔آسٹریلیا نے بارڈر گواسکر ٹرافی کے تحت اندور کے ہولکر اسٹیڈیم میں کھیلے گئے تیسرے ٹیسٹ میچ کے تیسرے دن بھارت کو 9 وکٹوں سے شکست دے کر چار میچوں کی ٹیسٹ سیریز میں پہلی جیت درج کی۔ اس میچ میں بھارت نے پہلے بیٹنگ کرتے ہوئے 109 رن بنائے جس کے جواب میں آسٹریلیا نے اپنی پہلی اننگ میں 197 رن بنائے اور پہلی اننگ کی بنیاد پر 88 رن کی برتری حاصل کی۔ بھارت نے دوسری اننگ میں 163 رن بنائے اور آسٹریلیا کو جیت کے لیے 76 رن کا ہدف دیا۔76 رن کے ہدف کے تعاقب میں آسٹریلوی ٹیم نے 1 وکٹ پر 78 رن کی ناقابل شکست شراکت داری کر کے آسٹریلیا کو 9 وکٹوں سے کامیابی دلا دی۔ اوپنرز ٹریوس ہیڈ 49 اور مارنس لابوشین 28 رن بنا کر ناٹ آؤٹ رہے۔اس فتح کی بدولت آسٹریلیا کی جیت کا فیصد 68.52 رہا اور وہ فائنل کے لیے کوالیفائی کر گیا ہے، یعنی احمد آباد میں بھارت کے خلاف چوتھے ٹیسٹ کے نتیجے کا آسٹریلوی ٹیم پر کوئی اثر نہیں پڑے گا، جبکہ بھارت کی جیت کا تناسب 60.29 فیصد کے ساتھ وہ دوسرے نمبر پر ہے۔ سری لنکن ٹیم کے پاس بھارت کو ہرانے کا موقع ہے۔اگر ہندوستان احمد آباد میں آسٹریلیا کے خلاف چوتھا ٹیسٹ جیت جاتا ہے تو ہندوستان ڈبلیو ٹی سی فائنل میں اپنی جگہ پر مہر لگا لے گا، لیکن اگر میچ ڈرا پر ختم ہوتا ہے یا آسٹریلیا جیت جاتا ہے تو سری لنکا کے لیے دروازے کھل جائیں گے۔سری لنکا کو رواں ماہ نیوزی لینڈ کے خلاف دو میچوں کی ٹیسٹ سیریز کھیلنی ہے اور اگر سری لنکا یہ سیریز 2-0 سے جیتتا ہے تو وہ ڈبلیو ٹی سی فائنل کے لیے کوالیفائی کر لے گا۔
