Taasir Urdu News Network – MD. ARSHAD 09 APRIL
پٹنہ، 08 اپریل (تاثیر بیورو) وزیر اعلیٰ جناب نتیش کمار،آج حج بھون میں جے ڈی یو کی طرف سے منعقد دعوت افطار میں شریک ہوئے، انہیں گلدستہ، ٹوپی اور رومال یش کرکے ان کا خیرمقدم کیا گیا۔ افطار کے بعد نماز ادا کی گئی، جس میں دعوت افطار میں شامل وزیر اعلیٰ سمیت تمام روزہ داروں نے ریاست، سماج اور ملک میں امن، امان اور بھائی چارے قائم رکھنے کی دعا کی۔ وزیراعلیٰ نے دعوت افطار میں شرکت کرنے والے مختلف جماعتوں کے رہنماؤں کا خیرمقدم کیا۔اس موقع پر نائب وزیر اعلیٰ جناب تیجسوی پرساد یادو، مالیات، کمرشیل ٹیکس اور پارلیمانی امور کے وزیر جناب وجے کمار چودھری، آبی وسائل کے وزیر جناب سنجے کمار جھا، وزیر قانون جناب شمیم احمد، محصولات اور اصلاحات اراضی کے وزیر جناب آلوک کمار مہتا، پسماندہ طبقات اور انتہائی پسماندہ طبقات بہبود کی وزیر محترمہ انیتا دیوی، خوراک اور صارفین تحفظ کی وزیر محترمہ لیشی سنگھ، اقلیتی فلاح کے وزیر جناب زماں خان، آفات مینجمنٹ کے وزیر جناب شاہنواز، بہار قانون ساز اسمبلی کے اسپیکر جناب اودھ بہاری چودھری، بہار قانون ساز کونسل کے چیئرمین مسٹر دیویش چندر ٹھاکر، جے ڈی یو کے قومی صدر و ایم پی مسٹر راجیو رنجن سنگھ عرف للن سنگھ، کانگریس کے ریاستی صدر ورکن پارلیمنٹ مسٹر اکھلیش پرساد سنگھ، سابق وزیر اعلیٰ مسٹر جیتن رام مانجھی، قانون ساز کونسل کے رکن جناب سنجے کمار سنگھ عرف گاندھی، قانون ساز کونسل کے رکن جناب خالد انور، جے ڈی یو کے ریاستی صدر مسٹر امیش کشواہا، بہار ریاستی سنی وقف بورڈ کے چیئرمین جناب ارشاد اللہ، بہار ریاستی شیعہ وقف بورڈ کے چیئرمین سید افضل عباس، جے ڈی یو اقلیتی سیل کے صدرجناب سلیم پرویز، چیف سکریٹری جناب عامر سبحانی، محکمہ اقلیتی فلاح کی پرنسپل سکریٹری ڈاکٹر سفینہ اے این سمیت دیگر معززین اور روزہ دار موجود تھے۔حج بھون میں منعقدہ دعوت افطار میں شرکت کے بعد صحافیوں سے بات کرتے ہوئے وزیر اعلیٰ نے کہا کہ آج ہم لوگ یہاں دعوت افطار میں آئے ہیں، آپ سب کو بہت بہت مبارک ہو۔ کل بھی آپ نے 1 انے مارگ پر منعقدہ دعوت افطار میں شرکت کی۔نوادہ اور ساسارام تشدد میں ملزمین کے گھروں کی قرقی کے سوال پر وزیر اعلیٰ نے کہا کہ دونوں جگہوں پر انتظامیہ کے لوگ لگے ہوئے ہیں۔ وہ لوگ اپنا کام کر رہے ہیں۔ جہاں بھی نقصان پہنچایاگیا ہے اس کے لیے بھی کچھ کیا جائے گا۔ عوام کے مفاد میں جو بھی کرنا ہے وہ کیاجائے گا۔اڈانی کیس میں جے پی سی کی تشکیل سے متعلق مسٹر شرد پوار کے بیان پر وزیر اعلیٰ نے کہا کہ یہ تو وہی بتائیں گے، ہم نے بھی دیکھا کہ لوگوں کی رائے اپنی اپنی ہوتی ہے، یہ ان کی اپنی خواہش ہے۔
