TAASIR NEWS NETWORK- SYED M HASSAN –19 MAY
میرٹھ، 19 مئی: میرٹھ ضلع میں اکھل بھارت ہندو مہاسبھا نے جمعہ کو ناتھورام گوڈسے کے یوم پیدائش پر پوجا کی۔ مہاسبھا کے کارکنان نے مرکزی حکومت سے میرٹھ کا نام تبدیل کر کے ناتھورام گوڈسے نگر کرنے کا مطالبہ کیا۔شاردا روڈ پر واقع اکھل بھارت ہندو مہاسبھا کے دفتر میں جمعہ کو ناتھورام گوڈسے کے 123ویں یوم پیدائش پر پوجا کا اہتمام کیا گیا۔ ہندو مہاسبھا کے قومی نائب صدر پنڈت اشوک شرما کی قیادت میں دفتر کے احاطے میں نصب ناتھورام گوڈسے اور نارائن نانا آپٹے کے مجسموں پر گل ہائے عقیدت پیش کئے گئے۔ اس کے بعد مٹھائیاں تقسیم کی گئیں۔ ریاستی ترجمان اور ہندو مہاسبھا کے ضلع صدر ابھیشیک اگروال نے وزیر اعظم نریندر مودی کو ایک خط بھیج کر میرٹھ کا نام تبدیل کر کے ناتھورام گوڈسے نگر رکھنے کا مطالبہ کیا ہے۔
انہوں نے کہا کہ گوڈسے خاندان کا میرٹھ سے گہرا تعلق ہے۔ ناتھورام گوڈسے کے چھوٹے بھائی گوپال گوڈسے نے میرٹھ سے 1989 کا لوک سبھا الیکشن لڑا تھا۔ ناتھورام اور ان کے خاندان کے افراد بھی میرٹھ آیا کرتے تھے۔
