ورلڈ کپ سے باہر ہونے پر ویسٹ انڈیز ٹیم کو سخت تنقید کا سامنا

TAASIR NEWS NETWORK- SYED M HASSAN -02 JULY      

نئی دہلی ،02جولائی:ویسٹ انڈیز کرکٹ ٹیم کے ورلڈ کپ سے باہر ہوتے ہی ٹیم کو سخت تنقید کا سامنا ہے ۔مقامی اور سابق کرکٹرز نے تنقید کے توپوں کا رخ بورڈ کی طرف کر لیا ہے ۔ویسٹ انڈیز کرکٹ ٹیم کے سابق کپتان کارلوس بریتھ ویٹ نے کہا ہے کہ یہ وہ کم ترین جگہ ہے جہاں آپ جا سکتے ہیں، یہ چیز عرصہ دراز سے ہماری طرف بڑھ رہی تھی۔کارلوس بریتھ ویٹ نے کہا کہ گزشتہ برس ٹی ٹوئنٹی فارمیٹ کا سپر 12 مرحلہ مِس کیا، وائٹ بال کرکٹ میں گزشتہ برسوں سے مشکلات رہی ہیں۔
انہوں نے کہا کہ ویسٹ انڈیز کرکٹ کو بے شمار مسائل کا سامنا ہے، ٹیلنٹ کی شناخت نہ کر پانا مسائل میں سے ایک ہے۔سابق کرکٹر اور کمنٹیٹر این بشپ نے کہا ہے کہ یہ ڈرامائی انداز سے اپنے ایک مقام سے گرنا ہے، ویسٹ انڈیز ٹیم ون ڈے اور ٹی ٹوئنٹی ورلڈ کپ دو دو بار جیت چکی ہے۔ این بشپ نے کہا کہ کپتان تبدیل کرو، کوچ تبدیل کرو، جو چاہے تبدیلی لاؤ لیکن نتائج توقعات کے برعکس ہیں۔
انہوں نے یہ بھی کہا کہ ویسٹ انڈیز کی ٹیم بلند عزائم کے ساتھ کوالیفائنگ راؤنڈ کھیلنے کے لیے گئی لیکن اس کی کارکردگی انتہائی مایوس کن رہی۔
واضح رہے کہ دو دو بار کی چمپئن ویسٹ اینڈیز کو کل اسکاٹ لینڈ کی ٹیم نے شکست سے دو چار کیا جس کے بعد ویسٹ انڈیز کی ٹیم ورلڈ کپ کوالیفائی کرنے میں نا کام ہوگئی ،اور یہ پہلی مرتبہ ہے جس میں ویسٹ انڈیز کی ٹیم ورلڈ کپ میں کوالیفائی نہیں کر سکی ہے ۔