TAASIR NEWS NETWORK- SYED M HASSAN –31 AUG
ملتان، 31 اگست: پاکستان کے بہترین بلے باز بابر اعظم نے بدھ کو ایشیا کپ ٹورنامنٹ میں نیپال کے خلاف 151 رن کی شاندار سنچری کھیل کر کئی ریکارڈ اپنے نام کر لئے۔ پاکستان اور نیپال کے درمیان ایشیا کپ کے افتتاحی میچ میں پاکستان کے کپتان بابر نے ملتان میں 131 گیندوں پر 151 رن کی شاندار اننگز کھیل کر اپنی ٹیم کو 342/6 کے اسکور تک پہنچانے میں اہم کردار ادا کیا۔
اس اننگز کے ساتھ انہوں نے ایشیا کپ میں بہترین اننگز کھیلنے کے حوالے سے خود کو دوسرے نمبر پر پہنچا دیا۔ ٹورنامنٹ میں سب سے زیادہ 183 رن کی اننگز کھیلنے کا ریکارڈ اب بھی بھارتی بلے باز وراٹ کوہلی کے پاس ہے۔ بابر نے بنگلہ دیش کے مشفق الرحیم کو پیچھے چھوڑ دیا جنہوں نے اس سے قبل 144 رن بنائے تھے۔
بابر اب پاکستان کے لیے ون ڈے میں سب سے زیادہ سنچریاں بنانے والے سعید انور کی برابری کرنے سے صرف ایک سنچری دور ہیں۔ پاکستان کے سابق بلے باز سعید نے اپنے ون ڈے کیریئر میں 20 سنچریاں اسکور کی ہیں جب کہ بابر کے نام 19 سنچریاں ہیں۔
اس کے علاوہ بابر بھی تمام فارمیٹس میں پاکستان کے لیے سب سے زیادہ سنچریاں بنانے والے ایلیٹ کلب میں شامل ہو گئے۔ وہ سعید انور، جاوید میانداد اور اظہر علی کے ساتھ سب سے زیادہ سنچریاں بنانے والے چوتھے کھلاڑی بن گئے۔ ان کے نام اب تک تمام فارمیٹس میں 31 سنچریاں ہیں۔ یونس خان 41 سنچریوں کے ساتھ پاکستان کے صف اول کے بلے باز ہیں۔
کپتان بابر اعظم اور افتخار احمد (109 ناٹ آو?ٹ) کی شاندار سنچریوں کی بدولت پاکستان نے نیپال کو جیت کے لیے 343 رن کا ہدف دیا۔ جواب میں نیپالی ٹیم 23.4 اوورز میں صرف 104 رنوں سمٹ گئی اور 238 رن سے میچ ہار گئی۔