TAASIR NEWS NETWORK- SYED M HASSAN –08 AUG
اسلام آباد،8اگست : پاکستان تحریکِ انصاف (پی ٹی آئی) کے چیئرمین اور سابق وزیرِ اعظم عمران خان کی سزا کے خلاف اسلام آباد ہائی کورٹ میں درخواست دائر کر دی گئی ہے۔اسلام آباد کی سیشن عدالت نے گزشتہ ہفتے توشہ خانہ کیس میں عمران خان کو مجرم قرار دیتے ہوئے تین سال قید کی سزا سنائی تھی اور وہ اٹک جیل میں قید ہیں۔گزشتہ روز سابق وزیرِ اعظم کے وکلا نے اٹک جیل میں ان سے ملاقات کرکے پاور آف اٹارنی پر دستخط لیے تھے۔سابق وزیرِ اعظم کے وکیل خواجہ حارث اور بیرسٹر گوہر نے منگل کو اسلام آباد ہائی کورٹ میں سزا معطلی کی اپیل دائر کی ہے۔مقامی میڈیا کے مطابق درخواست میں کہا گیا ہے کہ ٹرائل کورٹ کا فیصلہ خلافِ قانون ہے جسے کالعدم قرار دیا جائے۔درخواست میں فیصلہ عارضی طور پر معطل کرکے ضمانت کی بھی استدعا کی گئی ہے۔دوسری جانب عمران خان کے ترجمان رؤف حسن نے کہا ہے کہ امید ہے عمران خان کی جلد ضمانت ہو جائے گی اور ان کے خلاف آنے والا عدالتی فیصلہ کالعدم ہو جائے گا جس سے ان کی نا اہلی بھی ختم ہو جائے گی۔خبر رساں ادارے ’اے ایف پی‘ کے مطابق رؤف حسن کا کہنا تھا کہ عمران خان کو جیل میں انتہائی نامناسب اور غیر انسانی حالات میں رکھا گیا ہے لیکن ان کا عزم متزلزل نہیں ہوا۔ان کے بقول، عمران خان کو انگریز دور کے ایک چھوٹے سے سیل میں رکھا گیا ہے جہاں وہ زمین پر سو رہے ہیں اور کمرہ اس قدر چھوٹا ہے کہ انہیں نماز کی ادائیگی میں بھی مشکل پیش آ رہی ہے۔رئوف حسن نے مزید کہا کہ سابق وزیرِ اعظم نے عزم ظاہر کیا ہے کہ وہ کسی بھی صورت میں اصولوں پر سمجھوتا نہیں کریں گے۔