TAASIR NEWS NETWORK- SYED M HASSAN -25 AUG
ایتھنز، 25 اگست: ہندوستان کے وزیر اعظم نریندر مودی جنوبی افریقہ کے جوہانسبرگ میں 15ویں برکس سربراہی اجلاس کے اختتام کے بعد یونان کے ایک روزہ سرکاری دورے پر آج صبح ایتھنز پہنچے۔ ایتھنز میں ان کا پرتپاک استقبال کیا گیا۔
اس دوران وہ مختلف پروگراموں میں شرکت کریں گے۔ وزیر اعظم مودی رسمی استقبال کے بعد صدر اور وزیر اعظم کیریاکوس متسوتاکس کے ساتھ ملاقاتیں کریں گے۔ اس کے علاوہ وہ دونوں ممالک کی کاروباری برادری اور بیرون ملک مقیم ہندوستانیوں سے بھی ملاقات کریں گے۔
میڈیا رپورٹس کے مطابق وزیراعظم مودی ایئرپورٹ پر استقبال کے بعد ایتھنز کے ہوٹل گرانڈے بریٹین پہنچے۔ انہوں نے ہوٹل کے باہر جمع ہندوستانی تارکین وطن سے ملاقات کی۔ قابل ذکر ہے کہ وزیر اعظم مودی 40 سالوں میں یونان کا دورہ کرنے والے پہلے ہندوستانی وزیر اعظم ہیں۔ اس سے قبل ہندوستان کی اس وقت کی وزیر اعظم اندرا گاندھی نے ستمبر 1983 میں یونان کا دورہ کیا تھا۔