تاثیر،۲۸ اکتوبر۲۰۲۳:- ایس -ایم- حسن
تل ابیب /یروشلم/بیروت، 28 اکتوبر: فلسطینی جنگجو تنظیم حماس اور اسرائیل کے درمیان جنگ خطرناک موڑ پر پہنچتی دکھائی دے رہی ہے۔ اسرائیل نے کچھ ممالک کی جانب سے غزہ پٹی پر زمینی حملہ نہ کرنے کی عالمی اپیل اور انتباہ کو نظر انداز کرتے ہوئے آگے بڑھنا شروع کر دیا ہے۔ رات بھر کے فضائی حملوں کے بعد، جنگ کے 22ویں دن ہفتے کے روز، اسرائیل کی بری فوج سازو سامان کے ساتھ شمالی غزہ میں داخل ہوگئی ہے۔ یہ اطلاع میڈیا رپورٹس میں دی گئی ہے۔
اسرائیلی فوج کے چیف ملٹری ترجمان ریئر ایڈمرل ڈینیئل ہگاری نے بتایاکہ فوج ٹینکوں کے ساتھ شمالی غزہ میں داخل ہو گئی ہے۔ جنگی طیاروں نے رات کے وقت غزہ پٹی پر حملہ کیا اور حماس کی 150 سرنگوں اور بنکروں کو تباہ کر دیا۔ انہوں نے کہا کہ لبنان کی جانب سے ان کے فوجی ڈرون کو نشانہ بناتے ہوئے میزائل داغے گئے ۔ہماری سیکورٹی فورسز نے میزائل حملے کو ناکام بنا دیا۔ ہگاری نے کہا کہ غزہ کے آس پاس کے قصبوں میں خطرے کے سائرن بجانے کے بعد آج حماس کے ٹھکانوں پر راکٹ فائر کیے گئے۔ سب سے زیادہ راکٹ مگن قصبے میں داغے گئے۔ اس دوران اسرائیلی سرحد میں داخل ہو رہے حماس کے نیول کمانڈر کو ہلاک کر دیا گیا۔
چیف فوجی ترجمان ہگاری نے کہا کہ اسرائیلی زمینی افواج مرحلہ وار غزہ میں پیش قدمی کر رہی ہیں۔ اب تک ان کا کوئی فوجی زخمی نہیں ہوا ہے۔ اس عرصے میں حماس کو بہت زیادہ نقصان اٹھانا پڑا ہے۔
دوسری میڈیا رپورٹس میں کہا گیا ہے کہ لبنانی حکام نے ہفتے کے روز بیروت کے رفیق حریری بین الاقوامی ہوائی اڈے اور آس پاس کے علاقوں کے لیے وارننگ جاری کی ہے۔ وارننگ میں کہا گیا ہے کہ اسے جلد از جلد خالی کر دیا جائے۔ یہ انتباہ اسرائیلی فوج اور حزب اللہ کے دہشت گردوں کے درمیان حالیہ فائرنگ کے بعد جاری کیا گیا ہے۔ وارننگ میں یہ بھی کہا گیا کہ حزب اللہ نے 2006 میں دو اسرائیلی فوجیوں کو پکڑ لیا تھا۔ اس کے بعد اسرائیل نے اس ہوائی اڈے کے رن وے پر فضائی حملہ کیاتھا۔ اس بار بھی وہ کسی بھی وقت ہوائی حملہ کر سکتا ہے۔
دریں اثنا، قطر کے وزیر اعظم شیخ محمد بن عبدالرحمن بن جاسم الثانی نے برطانیہ کے وزیر خارجہ جیمز کلیورلی کے ساتھ اس جنگ پر ٹیلی فونک بات چیت کی ہے۔ شیخ محمد نے کہا کہ قطر کو کسی بھی بہانے اجتماعی سزا ناقابل قبول ہے۔