تاثیر،۱۱ اکتوبر۲۰۲۳:- ایس -ایم- حسن
سرینگر، 11 اکتوبر:: ملک کے صدر، دروپدی مرمو نے بدھ کو کہا کہ جب نوجوان “امن، خوشحالی اور نظم و ضبط” کے راستے پر چلیں گے، تو قوم خود بخود خوشحال اور ترقی کرے گی۔ تفصیلات کے مطابق کشمیر یونیورسٹی میں 40ویں کانووکیشن سے خطاب کرتے ہوئے صدرجمہوریہ مرمو نے کہا کہ قوم اس وقت مزید ترقی کرے گی جب زیادہ سے زیادہ نوجوان امن اور چین (امن اور خوشحالی) کی پیروی کریں گے۔ جب نوجوان نظم و ضبط کی پیروی کریں گے تو قوم ترقی کرے گی،” انہوں نے کشمیر یونیورسٹی کے کانووکیشن ہال کے اسٹیج سے اپنی تقریر کا آغاز ’’یہ چے موج کشمیر‘‘ سے کیا ،جس کے دوران زبردست تالیاں بجائی گئیں۔ انہوں نے کہا میں یہاں آ کر خوش ہوں۔ میں مختلف کانووکیشنز اور ملک کے مختلف اداروں اور یونیورسٹیوں میں گء ہوں لیکن میں نوجوانوں کو بتانا چاہتی ہوں کہ یہ کیمپس دوسروں سے زیادہ خوبصورت ہے۔ کشمیر یونیورسٹی کو ماضی میں بھی حضرت بل درگاہ کا فیض حاصل رہا ہے اور رہے گا۔ انہوں نے کہا کہ میں کشمیر یونیورسٹی کے طلباء کو اعلیٰ تعلیم حاصل کرنے کے ساتھ ساتھ سماجی خدمات میں بھی حصہ لیتے ہوئے دیکھنا چاہوں گی، تاکہ معاشرے میں تبدیلی آئے۔ 462 طالب علموں میں سے 21 ٹاپرز میں گولڈ میڈل تقسیم کرنے کے بعد، انہوں نے کہا: “مجھے یہ دیکھ کر خوشی ہوئی کہ ٹاپ کرنے والوں میں 55 فیصد لڑکیاں تھیں۔ ہماری لڑکیاں اور خواتین ہر میدان میں اپنی صلاحیتوں کا لوہا منوا رہی ہیں۔ آج کے ایوارڈ یافتہ ہماری تصویر اور تقدیر ہیں۔ ماحولیات کے تحفظ پر زور دیتے ہوئے انہوں نے کہا کہ اوپر والے نیکشمیر کو قدرتی تحفے سے نوازا ہے۔اس دوران انہوں نے کشمیری کہاوت کا انتخاب کیا: “آن پوشے تیلی وان پوشے۔ فطرت کی حفاظت ہماری ذمہ داری ہے اور یہیں پر نوجوانوں کو اپنا کردار ادا کرنا ہوگا۔ کشمیر یونیورسٹی ہمالیائی گلیشیئرز کی حفاظت کے لیے اپنی پوری کوشش کر رہی ہے اور مجھے معلوم ہوا ہے کہ کئی محاذوں پر تحقیق کا سلسلہ جاری ہے۔صدر نے جموں و کشمیر کو قومی تعلیمی پالیسی کو مکمل طور پر نافذ کرنے اور دیگر ریاستوں اور مرکز کے زیر انتظام علاقوں پر سبقت حاصل کرنے پر مبارکباد دی۔ انہوں نے تمام ایوارڈ حاصل کرنے والوں کے بہتر مستقبل کی خواہش کی۔ قبل ازیں صدر مرمو کشمیر پہنچیں اور ہوائی اڈے پر ایل جی منوج سنہا نے ان کا استقبال کیا جہاں انہیں گارڈ آف آنر دیا گیا۔ ہوائی اڈے سے، وہ جنگی یادگار پر شہید فوجیوں کو خراج عقیدت پیش کرنے کے لیے سری نگر میں فوج کے 15 کور ہیڈکوارٹر تک پہنچیں۔ وہ ایک رات سری نگر میں قیام کریں گی اور دن میں وہ مقامی قبائلی گروپوں اور خواتین کے سیلف ہیلپ گروپس کے ساتھ بات چیت کریں گی۔ صدر جمہوریہ راج بھون سری نگر میں ان کے اعزاز میں دیے جانے والے ایک شہری استقبالیہ میں بھی شرکت کریں گی۔ جمعرات کی صبح صدر جموں کے کٹرا میں ماتا ویشنو دیوی کے لیے روانہ ہوں گی تاکہ دوبارہ تعمیر شدہ پاروتی بھون اور اسکائی واک کا افتتاح کریں۔ پولیس اور انتظامیہ کے اعلیٰ افسران بشمول ڈی جی پی دلباغ سنگھ، اے ڈی جی پی وجے کمار، اسپیشل ڈی جی (سی آئی ڈی) آر آر سوین، ایس ایس پی سری نگر راکیش بھلوال، ڈویڑنل کمشنر کشمیر وجے کمار بھیدوری، ڈی سی سری نگر اعجاز اسد، میئر ایس ایم سی جنید متو، وقف بورڈ کے چیئرپرسن درخشاں اندرابی اور دیگر افسران بھی اس موقع پر یونیورسٹی میں موجود تھے۔