تاثیر،۱۱ نومبر۲۰۲۳:- ایس -ایم- حسن
فریدآباد، 11 نومبر: فرید آباد میں خاتون ٹیچر کی طرف سے پھینکے گئے اسٹیل اسکیل سے چھٹی جماعت کے طالب علم کی آنکھ پھوٹ جانے کے معاملے میں 20 دن گزر جانے کے باوجود ملزم ٹیچر اور انتظامیہ کے خلاف کوئی کارروائی نہیں کی گئی۔ اہل خانہ پولیس کی کارروائی سے مطمئن نہیں ہیں اور انہوں نے اس سلسلے میں پولیس کمشنر راکیش آریہ سے ملاقات کی اور ملزمین کے خلاف سخت کارروائی کی درخواست کی۔ یہ واقعہ 21 اکتوبر کو پیش آیا، جب حکومت نے گروپ سی اور ڈی کے امتحانات کے حوالے سے تمام اسکولوں میں تعطیل کا اعلان کیا تھا۔ آنکھ میں چوٹ لگنے کے بعد بچہ دیکھنے سے قاصر ہے۔
پولیس نے ٹیچر کے خلاف مقدمہ درج کر کے تفتیش شروع کر دی ہے، فی الحال ملزم ٹیچر کو گرفتار کر لیا گیا ہے۔ معلومات کے مطابق متاثرہ 12 سالہ طالب علم دیونش فرید آباد کے سرسوتی ششو سدن نامی اسکول میں چھٹی کلاس میں پڑھتا ہے۔ اس کے بھائی نکھل نے بتایا کہ دیونش نے کلاس میں کوئی شرارت کی، اس پر خاتون ٹیچر نے اسے سزا کے طور پر کھڑکی کے باہر کھڑا کر دیا، پھر اچانک پتہ نہیں کیا ہوا کہ ٹیچر پریتی نے دیونش کی طرف اسٹیل کا پیمانہ پھینکا جو اس کی آنکھ میں لگا اور اس کا خون بہنے لگا۔
نکھل نے بتایا کہ اسکول نے دیونش کو نہ تو کوئی ابتدائی طبی امداد دی اور نہ ہی اس واقعے کے بعد اسے اسپتال لے گئے کیونکہ ان کے پاس کوئی ایمبولینس نہیں تھی۔ یہ اسکول اتنی تنگ سڑک پر بنایا گیا ہے کہ اگر کوئی ناخوشگوار واقعہ پیش آجائے تو نہ تو فائر بریگیڈ اور نہ ہی ایمبولینس وہاں پہنچ سکتی ہے۔ نکھل نے بتایا کہ وہ کسی طرح اپنے بھائی کو اسکول سے ایک پرائیویٹ اسپتال لے گیا، نجی اسپتال کے ڈاکٹر نے بچے کی آنکھوں کی حالت دیکھ کر کہا کہ اس کا علاج کرنا ان کے بس میں نہیں ہے۔