تاثیر،۱۸ نومبر۲۰۲۳:- ایس -ایم- حسن
جموں ،18 نومبر:جموں پولیس نے دعویٰ کیا ہے کہ انہوں نے ایک بدنام چور کو گرفتار کیا ہے اور اس کے قبضے سے 40 تولہ چوری شدہ سونا اور نقدی برآمد کی ہے۔ جموں کے سینئر سپرنٹنڈنٹ آف پولیس ڈاکٹر ونود کمار نے یہاں پولیس اسٹیشن جانی پور میں میڈیا کے نمائندوں سے خطاب کرتے ہوئے کہا کہ حال ہی میں تھانہ بخشی نگر اور جانی پور کے دائرہ اختیار میں آنے والے علاقوں میں چار مختلف چوری کی وارداتیں رپورٹ ہوئیں۔ ان معاملات کی تحقیقات کرتے ہوئے انہوں نے کہا کہ ایس ڈی پی او ویسٹ وکرم سنگھ کی سربراہی میں پولیس افسران کی ایک ٹیم نے گڑہ قاسم نگر کے شبھم نامی ایک مشتبہ شخص کو گرفتار کیا۔ پوچھ گچھ کے دوران ایس ایس پی جموں نے بتایا کہ مشتبہ شخص نے چوری میں ملوث ہونے کا اعتراف کیا اور اس کے انکشاف پر پولیس اسٹیشنوں جانی پور اور بخشی نگر کے دائرہ کار میں واقع علاقوں سے چوری شدہ 40 تولہ سونا برآمد ہوا۔اْنہوں نے کہا کہ باقی سونا سی آر پی سی کی دفعہ 102 کے تحت ضبط کیا گیا ہے۔ ایس ایس پی جموں نے مزید کہا کہ ملزم جنہوں نے پولیس اسٹیشنوں جانی پور، بخشی نگر اور ڈومانہ کے دائرہ اختیار میں آنے والے علاقوں میں کئی چوری کی وارداتیں کیں، چوری شدہ سونا حکمت عملی کے ساتھ تین مختلف مالیاتی اداروں میں رکھا۔ مشکوک ذرائع سے سونا خریدنے میں ملوث مالیاتی اداروں کے خلاف کارروائیوں کے بارے میں پوچھے جانے پر ایس ایس پی جموں نے کہا کہ ہم ایسے اداروں کو چارج شیٹ کرنے کے لیے اس موضوع پر ماہرین سے قانونی رائے حاصل کر رہے ہیں۔