تاثیر،۳۰ نومبر۲۰۲۳:- ایس -ایم- حسن
اسلام آباد، 30 نومبر:پاکستان کرکٹ اسکواڈ گزشتہ رات لاہور سے آسٹریلیا کے لیے روانہ ہوگیا، پاکستانی کرکٹ اسکواڈ براستہ دبئی سڈنی جائے گا، پاکستان اور آسٹریلیا کے درمیان پہلا ٹیسٹ 14 دسمبر کو شروع ہوگا۔پاکستانی ٹیم کی قیادت محض تیس ٹیسٹ کا تجربہ رکھنے والے شان مسعود کررہے ہیں جنہیں پہلی مرتبہ کپتانی کی ذمے داریاں سونپی گئی ہیں۔ ٹیم میں شامل دیگر تجربہ کار کھلاڑیوں میں سرفراز احمد، بابر اعظم، محمد رضوان، حسن علی، شاہین آفریدی، امام الحق جیسے کھلاڑی شامل ہیں۔پاکستانی ٹیم آسٹریلیا میں ٹیسٹ سیریز کے آغاز سے قبل چھ دسمبر سے پرائم منسٹر الیون کے خلاف چار روزہ میچ کھیلے گی۔پاکستانی ٹیم کا پہلا ٹیسٹ 14 دسمبر سے پرتھ میں شروع ہوگا، جبکہ دوسرا ٹیسٹ ملبورن میں 26 دسمبر سے کھیلا جائے گا جبکہ تیسرا ٹیسٹ تین جنوری سے سڈنی میں ہوگا۔