تاثیر،۲۶ نومبر۲۰۲۳:- ایس -ایم- حسن
نئی دہلی،26؍نومبر:وزیر اعظم نریندر مودی کی حفاظت میں کوتاہی برتنے پر پنجاب پولیس کے سات اہلکاروں کو معطل کر دیا گیا ہے۔ گزشتہ سال وزیر اعظم نریندر مودی کے دورہ پنجاب کے دوران سیکورٹی کی خلاف ورزی کا معاملہ سامنے آیا تھا۔ جن پولیس اہلکاروں کو معطل کیا گیا ہے ان میں فیروز پور ضلع کے اس وقت کے پولیس سپرنٹنڈنٹ اور ڈی ایس پی رینک کے دو افسران شامل ہیں۔پی ایم کی سیکورٹی میں کوتاہی کا یہ معاملہ گزشتہ سال 5 جنوری کو سامنے آیا تھا۔ اس دوران وزیر اعظم مودی اسمبلی انتخابات کے لیے ایک ریلی میں شرکت کے لیے پنجاب میں تھے۔ احتجاجی کسانوں کی جانب سے ناکہ بندی کی وجہ سے وزیر اعظم کا قافلہ تقریباً 20 منٹ تک فلائی اوور پر پھنسا رہا۔بی جے پی رہنماؤں نے اس کوتاہی پر اس وقت کی چرنجیت سنگھ چنی حکومت کو نشانہ بنایا تھا، جب کہ کانگریس کا کہنا تھا کہ ایسا اس لیے ہوا کیونکہ آخری وقت میں وزیر اعظم کے سفری منصوبے میں تبدیلی کی گئی تھی۔بھگونت مان حکومت نے پی ایم مودی کی سیکورٹی میں کوتاہی کو لے کر پولیس والوں کے خلاف یہ کارروائی کی ہے۔ آپ کو بتاتے چلیں کہ فیروز پور کے اس وقت کے پولیس چیف اور اب بھٹنڈہ کے ایس پی گربندر سنگھ کو پہلے معطل کر دیا گیا تھا۔ کارروائی کا سامنا کرنے کے لیے 22 نومبر کے حکم نامے میں مزید چھ پولیس اہلکاروں کے نام درج ہیں۔ریاستی محکمہ داخلہ کے حکم کے مطابق ڈی ایس پی رینک کے افسران پرسن سنگھ اور جگدیش کمار، انسپکٹرز جتندر سنگھ اور بلوندر سنگھ، سب انسپکٹر جسونت سنگھ اور اسسٹنٹ سب انسپکٹر رمیش کمار کو بھی معطل کر دیا گیا ہے۔ تمام سات پولیس اہلکاروں کو پنجاب سول سروسز (سزا اور اپیل) رولز 1970 کے رول 8 کے تحت کارروائی کا سامنا کرنا پڑے گا۔ ان قوانین کے تحت سزا پروموشن روکنے سے لے کر سروس سے برخاستگی تک ہو سکتی ہے۔