تاثیر،۱۰ نومبر۲۰۲۳:- ایس -ایم- حسن
غازی آباد، 10 نومبر:ڈاکٹر پلوو باجپئی کے ساتھ جھگڑے کے بعد کوی ڈاکٹر کمار وشواس کی سیکورٹی کے لیے تعینات سی آر پی ایف یونٹ کو ہٹا کر اب دوسری یونٹ کو تعینات کر دیا گیا ہے۔ یہ فیصلہ تنازعہ کے دوران کمار وشواس کی سیکورٹی کے لیے تعینات سی آر پی ایف اہلکاروں کے خلاف جاری تحقیقات کے پیش نظر لیا گیا ہے۔ ڈاکٹر باجپئی نے کمار وشواس کے سیکورٹی اہلکاروں پر حملہ کا الزام لگایا تھا۔
کمار وشواس کو مرکزی حکومت سے وائی زمرہ کی سیکورٹی ملی ہے۔ ان کی حفاظت کے لیے تعینات یونٹ کے ساتھ بدھ کو سڑک پر ایک واقعہ پیش آیا۔ اس وقت کمار وشواس غازی آباد سے علی گڑھ جا رہے تھے۔ سی آر پی ایف کے ڈائریکٹر جنرل ایس ایل تھاوسین نے واقعہ کا جائزہ لینے کے بعد کورٹ آف انکوائری کا حکم دیا ہے۔ انہوں نے جمعہ کو کہا کہ پہلی نظر میں یہ معلوم ہوا ہے کہ سیکیورٹی کے لیے تعینات کمانڈوز آپریشنل طریقہ کار پر عمل نہیں کرتے تھے۔
ڈاکٹر کمار وشواس کے سیکورٹی اہلکاروں کی طرف سے بدھ کو پولس میں شکایت درج کروائی گئی۔ یہ الزام لگایا گیا تھا کہ ان کی گاڑی کو ایک کار نے ٹکر ماری تھی، اور کمار وشواس کے قافلے کے ساتھ موجود سی آر پی ایف اور پولیس اہلکاروں پر بھی حملہ کیا گیا تھا۔ اس واقعہ کے بعد ڈاکٹر باجپئی نے اپنی گاڑی کے ٹکرانے کے حوالے سے اندرا پورم پولیس اسٹیشن میں ایف آئی آر درج کروائی۔ انہوں نے الزام لگایا کہ کمار وشواس کے سیکورٹی اہلکاروں نے ان پر حملہ کیا۔